قاراعاندىداعى ارناۋلى الەۋمەتتىك قىزمەت كورسەتۋ ورتالىعىندا بالالاردىڭ جاپپاي ۋلانۋ وقيعاسىن وبلىستىق پروكۋراتۋرا تەرگەپ تەكسەرۋدە، دەپ حابارلايدى “ادىرنا” پورتالى.
قىلمىستىق ءىس سانيتارلىق نورمالاردى بۇزۋ بابى بويىنشا تەرگەلۋدە.
«قاراعاندى وبلىسىنىڭ پروكۋراتۋراسى «ارناۋلى الەۋمەتتىك قىزمەت كورسەتۋ ورتالىعىندا» بالالاردىڭ ۋلانۋى بويىنشا قىلمىستىق كودەكستىڭ 304-بابىنىڭ 3-بولىگى «سانيتارلىق ەرەجەلەردى نەمەسە گيگيەنالىق نورمالاردى بۇزۋ» بويىنشا سوتقا دەيىنگى تەرگەۋدى جۇرگىزىپ جاتىر»، - دەلىنگەن حابارلامادا.
قىلمىستىق كودەكستىڭ 304-بابىنىڭ 3-بولىگىندە ءۇش جىلعا دەيىنگى مەرزىمگە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان شەكتەي وتىرىپ، 5 جىلدان 10 جىلعا دەيىن باس بوستاندىعىنان ايىرۋ جازاسى كوزدەلگەن. بۇل الدىن الۋ شاراسى، ەگەر كىنالىنىڭ ارەكەتى ەكى نەمەسە ودان دا كوپ ادامنىڭ ولىمىنە اكەپ سوقسا، تاعى قاراستىرىلادى.
«قازىرگى ۋاقىتتا قىلمىستىق ءىس بويىنشا وقيعانىڭ بارلىق ءمان-جايىن جان-جاقتى، تولىق جانە وبەكتيۆتى تەرگەۋدى قامتاماسىز ەتۋگە باعىتتالعان قاجەتتى تەرگەۋ ارەكەتتەرى جۇرگىزىلۋدە»، - دەپ قوستى باس پروكۋراتۋرا.
ەستەرىڭىزگە سالا كەتەيىك، قاراعاندىداعى «ارناۋلى الەۋمەتتىك قىزمەت كورسەتۋ ورتالىعىندا» بالالاردىڭ جاپپاي ۋلانۋىنا سەبەپ بولعان زات ءدارى-دارمەك تىزىمىمەن سالىستىرىلىپ تەكسەرىلدى، بىراق انىقتاۋ مۇمكىن بولمادى. بۇل تۋرالى ءبىر كۇن بۇرىن ءماجىلىس دەپۋتاتى اجار ساعاندىقوۆا ءمالىم ەتتى. ول بالالاردىڭ بەلگىسىز زاتتان ۋلانعانىن ەسكە الدى. قازىر پروكۋراتۋرا بالالاردىڭ ناقتى نەدەن زارداپ شەككەنىن انىقتاپ جاتىر.
اعىمداعى جىلدىڭ تامىز ايىندا اتالمىش ورتالىقتان 12 بالا ۋلانىپ، اۋرۋحاناعا تۇسكەن. ودان كەيىن ءبىر بالا قايتىس بولدى، كەيىنىرەك ورتالىقتىڭ تاعى ءبىر تاربيەلەنۋشىسى اۋرۋحانادا كوز جۇمدى.
