قازاقستاندا 59 تەمىرجول ۆوكزالى كۇردەلى جوندەۋدەن وتەدى. بۇل تۋرالى كولىك ءمينيسترى مارات قاراباەۆ مالىمدەدى، دەپ حابارلايدى “ادىرنا” ۇلتتىق پورتالى.
ءمينيستردىڭ ايتۋىنشا، قازىر جوندەۋدەن وتۋگە ءتيىس 59 تەمىرجول ۆوكزالى ايقىندالعان. ونىڭ تورتەۋى عانا تۇركىستان، قىزىلوردا، شىمكەنت جانە پاۆلودار قالالارىندا قازىر كۇردەلى جوندەۋدەن ءوتىپ جاتىر.
"وكىنىشكە قاراي، قالعاندارىنا مۇلدەم قارجى دا بولىنبەگەن، جاي-كۇيى دە تومەن. ءار ۆوكزالدىڭ ءوز تابىسى 50-60% عانا قامتي الادى. وسىعان بايلانىستى بارلىق اكىمدىك جوبالىق-سمەتالىق قۇجاتتاما ازىرلەپ جاتىر. وسى جىلدىڭ سوڭىندا ءبىز ونى قارجى ءبولۋ جاعىن بيۋدجەتتەن قاراستىرامىز با دەپ وتىرمىز", - دەدى قاراباەۆ سەنات وتىرىسىندا.
ول "قازاقستان تەمىر جولى" كومپانياسىنىڭ ءوز اقشاسى ۆاگون الۋعا، لوكوماتيۆ الۋعا جۇمسالىپ جاتىرعانىن دا ايتتى.
"مۇندا اكىمدەرمەن كەلىسكەنىمىز – عيماراتتى جوندەۋدى رەسپۋبليكالىق بيۋدجەتتەن قاراستىرامىز دەپ وتىرمىز. تەمىرجول ۆوكزالىنىڭ اۋلاسىن اكىمدىك بيۋدجەتى ەسەبىنەن كەلىسەمىز. بىراق جوبالىق-سمەتالىق قۇجاتتامانى اكىمدەردىڭ وزدەرى دايىنداپ جاتىر. تەمىرجول ۆوكزالدارىن جاڭارتۋ ساپانىڭ ارتۋىنا سەپتىگىن تيگىزەدى", - دەدى مينيستر.