قازاقستان سىرتقى ىستەر مينيسترلىگى اقش-تىڭ قازاقستاندىق تاۋارلاردىڭ ءبىر بولىگىنە 12,5 پايىز كولەمىندە قوسىمشا يمپورتتىق باج سالىعىن ەنگىزۋگە قاتىستى تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
Tengrinews دەرەگىنشە، اتالعان شارا ارنايى قازاقستانعا قارسى باعىتتالماعان جانە اقش-تىڭ كەڭ اۋقىمدى ساۋدا ساياساتى اياسىندا قابىلدانعان.
ءسىم جاڭا باجدار 2026 جىلدىڭ اقپان ايىنان باستاپ اقش-تىڭ 1974 جىلعى ساۋدا تۋرالى زاڭىنىڭ 122-ءبولىمى نەگىزىندە ەنگىزىلگەن 10 پايىزدىق ۋاقىتشا امبەباپ يمپورتتىق ۇستەمە باجدىڭ ورنىنا قولدانىلىپ وتىرعانىن حابارلادى. مينيسترلىك قازاقستان تاراپى بۇل وزگەرىستەر تۋرالى الدىن الا حاباردار بولعانىن جانە امەريكالىق تاراپپەن ءتيىستى كونسۋلتاتسيالار وتكىزىلگەنىن اتاپ ءوتتى. كەزدەسۋلەر بارىسىندا ساۋدا جانە ينتەگراتسيا مينيسترلىگى قازاقستانداعى ەڭبەك زاڭناماسى مەن ءماجبۇرلى ەڭبەككە قارسى قابىلدانىپ جاتقان شارالار جونىندە اقپارات ۇسىنعان.
اقش ساۋدا وكىلدىگى قورىتىندىسىنا سايكەس، قازاقستان ءماجبۇرلى ەڭبەك ارقىلى وندىرىلگەن تاۋارلاردىڭ يمپورتىنا جەكە تىيىم سالىنباعان ەلدەردىڭ قاتارىنا ەنگىزىلگەن.
سىرتقى ىستەر مينيسترلىگىنىڭ تۇسىندىرۋىنشە، اقش قابىلداعان شەشىم قازاقستانداعى ءۇشىنشى ەلدەردەن كەلەتىن ءتيىستى ونىمدەر يمپورتىنا باقىلاۋ تەتىكتەرىن باعالاۋعا بايلانىستى. سونىمەن قاتار ۆەدومستۆو قازاقستاننىڭ ءماجبۇرلى ەڭبەكتى جويۋ جونىندەگى حالىقارالىق مىندەتتەمەلەردى دايەكتى تۇردە ورىنداپ كەلە جاتقانىن، حالىقارالىق ەڭبەك ۇيىمى مەن وزگە دە كوپجاقتى تەتىكتەر اياسىنداعى جۇمىستى جالعاستىراتىنىن جەتكىزدى.
مينيسترلىك بۇل شەشىمنىڭ تەك قازاقستانعا عانا قاتىستى ەمەس ەكەنىن دە اتاپ ءوتتى.
«اقش ساۋدا وكىلدىگىنىڭ شەشىمى اقش يمپورتىنىڭ 99,4 پايىزىن قۇرايتىن 60 ەكونوميكاعا قولدانىلادى. سوندىقتان بۇل شارا قازاقستانعا عانا باعىتتالعان ەمەس، امەريكالىق اكىمشىلىكتىڭ جالپى ساۋدا ساياساتىنىڭ ءبىر بولىگى»، – دەلىنگەن ءسىم حابارلاماسىندا.
