اقش پرەزيدەنتى ترامپقا قاستاندىق جاساۋعا ارەكەتتەندى دەگەن ايىپپەن ۇستالعان 31 جاستاعى كوۋل توماس اللەنگە قاتىستى العاشقى سوت تىڭداۋى ءوتتى، دەپ حابارلايدى "ادىرنا" ۇلتتىق پورتالى.
سوت بارىسىندا فەدەرالدى پروكۋرور دجوسەلين باللانتاين كۇدىكتىنىڭ ارەكەتىنە ناقتى باعا بەرىپ، ونىڭ «امەريكا قۇراما شتاتتارىنىڭ پرەزيدەنتىن ولتىرۋگە ارەكەتتەنگەنىن» مالىمدەدى.
Reuters اگەنتتىگىنىڭ حابارلاۋىنشا، اللەنگە پرەزيدەنتتىڭ ومىرىنە قاستاندىق جاساۋ، قارۋدى شتاتارالىق شەكارا ارقىلى زاڭسىز تاسىمالداۋ جانە قارۋ قولدانۋ باپتارى بويىنشا ايىپ تاعىلىپ وتىر. ەگەر ونىڭ كىناسى دالەلدەنسە، ءومىر بويىنا باس بوستاندىعىنان ايىرىلۋى مۇمكىن.
سوت وتىرىسىندا كۇدىكتى ءوزىنىڭ كومپيۋتەرلىك عىلىمدار بويىنشا ماگيستر دارەجەسى بار ەكەنىن جانە بۇرىن سوتتالماعانىن ايتتى. ءىستى قاراعان سۋديا مەتيۋ شاربو اللەندى بەيسەنبىگە دەيىن قاماۋدا ۇستاۋ تۋرالى شەشىم شىعاردى.
تەرگەۋ دەرەكتەرىنە سايكەس، كاليفورنيا تۇرعىنى ءساۋىر ايىنىڭ باسىندا ۆاشينگتونداعى Hilton قوناق ۇيىنەن بولمە برونداپ، قالاعا پويىزبەن كەلگەن. ءتىنتۋ بارىسىندا قۇقىق قورعاۋ ورگاندارى ودان 12-كاليبرلى مىلتىق، جارتىلاي اۆتوماتتى پيستولەت جانە ءۇش پىشاقتى تاركىلەگەن.
سونداي-اق كۇدىكتى شابۋىل الدىندا تۋىستارىنا ەلەكتروندى حات جولداپ، ءوزىن «فەدەرالدى ءولتىرۋشى» دەپ اتاعان جانە اقش پرەزيدەنتىن «ساتقىن» دەپ ايىپتاعانى بەلگىلى بولدى.
قازىرگى ۋاقىتتا ءىس بويىنشا تەرگەۋ امالدارى جالعاسىپ جاتىر.
