ەندى قازاقستاندىقتار قوقىستى كەز كەلگەن جەرگە تاستاسا قوعامدىق جۇمىستارعا تارتىلادى. بۇل تۋرالى "اشىق نقا" سايتىندا "اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلار ەنگىزۋ تۋرالى" زاڭ جوباسى جاريالاندى، دەپ حابارلايدى “ادىرنا” ۇلتتىق پورتالى.
زاڭ بويىنشا ماجبۇرلى ەڭبەككە تەك قىلمىستىق نەمەسە اكىمشىلىك قۇقىق بۇزۋشىلىق جاساعانى ءۇشىن ايىپتاۋ تۋرالى سوت اكتىسى نەگىزىندە عانا تارتىلادى.
قۇجاتقا سايكەس، ەگەر ادام ۇساق بۇزاقىلىق جاساسا نەمەسە قوقىستاردى دۇرىس ەمەس جەرگە تاستاسا، مۇنداي قۇقىق بۇزۋشىعا بىرنەشە اەك كولەمىندە ايىپپۇل سالۋدىڭ ورنىنا قوعامدىق جۇمىستارعا تارتۋعا بولادى.
“سونىمەن قاتار، اكىمشىلىك جاۋاپكەرشىلىككە تارتىلعان تۇلعالاردىڭ تولەم قابىلەتسىزدىگى ورىن الۋدا. وسىلايشا، قوعامدىق جۇمىستاردى قولدانۋ قۇقىق بۇزۋشىعا، اسىرەسە، قوعامدىق ءتارتىپتى بۇزۋعا قول سۇققان ادامدارعا قاتىستى جاقسى تاربيەلىك جانە الدىن الۋ ءادىسى بولماق", - دەلىنگەن قۇجاتتا.
