يوردانيانىڭ اۋە شابۋىلىنا قارسى قورعانىس كۇشتەرى تاڭسارىدە يراننان ۇشىرىلعان بەس بالليستيكالىق زىمىراندى اتىپ ءتۇسىردى. بۇل تۋرالى 29 شىلدەدە كورولدىك قارۋلى كۇشتەرى مالىمدەدى، دەپ حابارلايدى «ادىرنا» ءتىلشىسى.
مالىمدەمەدە اۋە قورعانىسى جۇيەلەرى «يراننان ۇشىرىلىپ، كورولدىك اۋماعىنا باعىتتالعان بەس زىمىراننىڭ جولىن كەسىپ، ولاردى جويدى» دەپ كورسەتىلگەن.
سونداي-اق يوردانيا قارۋلى كۇشتەرىنىڭ ەلدىڭ اۋە كەڭىستىگىن قورعاۋ، قاۋىپسىزدىكتى قامتاماسىز ەتۋ جانە مەملەكەتتىك ەگەمەندىكتى ساقتاۋ جونىندەگى مىندەتتەرىن ورىنداۋدى جالعاستىرىپ جاتقانى اتاپ وتىلگەن.
«مەملەكەتتىڭ قاۋىپسىزدىگى مەن ازاماتتاردىڭ ومىرىنە قاتەر توندىرەتىن كەز كەلگەن ارەكەتكە جول بەرىلمەيدى»،– دەلىنگەن حابارلامادا.
ەسكە سالايىق، 8 شىلدەدە اقش پرەزيدەنتى دونالد ترامپ 18 ماۋسىمعا قاراعان ءتۇنى قول جەتكىزىلگەن اتىستى توقتاتۋ رەجيمىنىڭ ەندى كۇشىندە ەمەس ەكەنىن مالىمدەگەن بولاتىن. ودان كەيىنگى كۇندەرى امەريكالىق اسكەري كۇشتەر يران اۋماعىنا بىرنەشە رەت سوققى جاساعان. ۆاشينگتون بۇل ارەكەتتەردى يراننىڭ ورمۇز بۇعازى ارقىلى وتكەن كوممەرتسيالىق كەمەلەرگە قارسى ءىس-قيمىلدارىمەن بايلانىستىردى.
ءوز كەزەگىندە تەگەران تاياۋ شىعىستاعى بىرنەشە ەلدە ورنالاسقان امەريكالىق اسكەري بازالارعا سوققى بەرىپ، ورمۇز بۇعازىن جاپتى. سونداي-اق يران بيلىگى اق ءۇيدى ءبىتىم تۋرالى مەموراندۋم تالاپتارىن بۇزدى دەپ ايىپتادى.
