قازاقستاننىڭ اۆياتسيالىق اكىمشىلىگى قازاقستاندىق اۋە كومپانيالارىنا يران اۋماعىنىڭ ۇستىمەن، سونداي-اق ونىڭ اۋە كەڭىستىگىنە جاقىن ايماقتار ارقىلى رەيستەر ورىنداۋعا ۋاقىتشا تىيىم ەنگىزدى، دەپ حابارلايدى "ادىرنا" ۇلتتىق پورتالى.
شەشىم وڭىردەگى ۇشۋ قاۋىپسىزدىگىنە تونگەن قاتەردىڭ ارتۋىنا بايلانىستى قابىلدانعان. اكىمشىلىك مالىمەتىنشە، قابىلدانعان شارالار الدىن الۋ سيپاتىندا جانە جولاۋشىلار مەن اۋە كەمەلەرى ەكيپاجىنىڭ قاۋىپسىزدىگىن قامتاماسىز ەتۋگە باعىتتالعان.
قازىرگى تاڭدا قازاقستاندىق اۋە كومپانيالاردىڭ بارلىق رەيستەرى ىقتيمال قاۋىپتى ايماقتاردى اينالىپ ءوتۋ ارقىلى جۇزەگە اسىرىلىپ جاتىر.
«جاعداي قازاقستاننىڭ اۆياتسيالىق اكىمشىلىگىنىڭ تۇراقتى باقىلاۋىندا. قاۋىپ دەڭگەيىنىڭ وزگەرۋىنە قاراي قوسىمشا شەشىمدەر قابىلدانادى»، — دەلىنگەن رەسمي حابارلامادا.
ءتيىستى بۇيرىق اكىمشىلىكتىڭ رەسمي سايتىندا جاريالانعان. شەكتەۋ مەرزىمى ناقتى بەلگىلەنبەگەن جانە ارنايى شەشىم شىققانعا دەيىن كۇشىندە بولادى.
بۇعان دەيىن يران بيلىگى ەلدىڭ اۋە كەڭىستىگىندە تومەن بيىكتىكتە ورىندالاتىن بارلىق ۇشۋلارعا ءۇش اي مەرزىمگە تىيىم سالعان. بۇل تۋرالى حالىقارالىق NOTAM حابارلاماسىندا ايتىلعان.
قۇجاتقا سايكەس، ەلدە ۆيزۋالدى ۇشۋ ەرەجەلەرى (VFR) بويىنشا ورىندالاتىن بارلىق رەيستەر توقتاتىلعان.
سونىمەن قاتار، ەۋروپالىق اۆياتسيالىق قاۋىپسىزدىك اگەنتتىگى اۆياكومپانيالارعا يراننىڭ اۋە كەڭىستىگىن بارلىق بيىكتىكتەردە پايدالانباۋعا كەڭەس بەردى. اگەنتتىك مالىمەتىنشە، اقش تاراپىنان ىقتيمال اسكەري ارەكەتتەر قاۋپىنە بايلانىستى يراننىڭ اۋە شابۋىلىنا قارسى قورعانىس جۇيەلەرى جوعارى دايىندىق رەجيمىنە كوشكەن.
