فوتو: Reuters
اقش پەن يران اراسىنداعى اسكەري قاقتىعىس قايتا ءورشىدى. ۆاشينگتون يران اۋماعىنداعى نىساندارعا جاڭا سوققىلار جاساعاننان كەيىن، تەگەران ايماقتاعى امەريكالىق اسكەري نىساندارعا زىمىراندار مەن دروندار ارقىلى جاۋاپ بەردى. بۇل تۋرالى ۆۆس جازدى، دەپ حابارلايدى “ادىرنا”.
«سوققىلار يسلام رەۆوليۋتسياسى ساقشىلار كورپۋسىنىڭ (يرسك) ورمۋز بۇعازىنداعى ازاماتتىق كەمەلەرگە جانە ايماقتا ورنالاسقان امەريكالىق اسكەري قىزمەتشىلەرگە شابۋىل جاساۋعا جاساعان سوڭعى ارەكەتتەرىنەن كەيىن جاسالدى»، — دەلىنگەن ورتالىق قولباسشىلىقتىڭ X الەۋمەتتىك جەلىسىندەگى جازباسىندا.
ال يراننىڭ قىزىل جارتى اي قوعامى اقش-تىڭ زىمىراندىق سوققىسى سالدارىنان ءتورت ادام، ونىڭ ىشىندە ءبىر بالا قازا تاپقانىن حابارلادى. سوققىنىڭ سىنىقتارى يراننىڭ وڭتۇستىگىندەگى سيريك قالاسىنداعى تۇرعىن ۇيگە تيگەن. سول ۋاقىتتا عيماراتتا توي ءوتىپ جاتقان.
اقش پرەزيدەنتى دونالد ترامپ ءوزىنىڭ Truth Social جەلىسىندە امەريكالىق سوققىلاردىڭ يراننىڭ ورمۋز شىعاناعىنا جاڭا مينالار قويۋعا جانە يوردانياداعى امەريكالىق بازاعا سەگىز زىمىرانمەن شابۋىل جاساۋعا ارەكەتتەنۋىنە جاۋاپ رەتىندە جاسالعانىن جازدى. ترامپتىڭ مالىمدەۋىنشە، ەكى ارەكەت تە ءساتسىز اياقتالعان.
ەگەر يران بۇل جولى دا جاۋاپ بەرۋگە شەشىم قابىلداسا، دونالد ترامپ جاڭا سوققىلار جاسالاتىنىن جانە ولاردىڭ «الدەقايدا كۇشتى ءارى جوعارى دەڭگەيدە» بولاتىنىن مالىمدەدى.
يسلام رەۆوليۋتسياسى ساقشىلار كورپۋسى اقش-تىڭ بۇل جاڭا سوققىلارىنا وكىنەتىنىن مالىمدەدى. ال يراننىڭ اقپارات اگەنتتىكتەرى ايماقتاعى امەريكالىق بازالارعا زىمىراندار مەن دروندار ارقىلى جاۋاپ شابۋىلدارى باستالىپ كەتكەنىن حابارلادى.
وسى اپتانىڭ باسىندا اقش شىلدە ايىنان بەرى العاش رەت يران اۋماعىنداعى نىساندارعا سوققى جاساعان بولاتىن. اتاپ ايتقاندا، ورمۋز بۇعازىنداعى لاراك ارالىنداعى ەكى زىمىران قوندىرعىسى نىساناعا الىندى. بۇعان جاۋاپ رەتىندە يران يوردانياداعى اسكەري-اۋە بازالارىنا زىمىراندارمەن شابۋىل جاساپ، بىرىككەن اراب امىرلىكتەرىنە ءبىر درون ۇشىردى.
يراننىڭ جەرگىلىكتى بيلىك وكىلدەرى اقش اسكەريلەرى ەلدىڭ وڭتۇستىگىندەگى ومان شىعاناعى جاعالاۋىندا ورنالاسقان چاباحار جانە كوناراك پورتتارى ماڭىنداعى اۋداندارعا، كەمىندە، ءتورت زىمىرانمەن سوققى جاساعانىن حابارلادى.
سونىمەن قاتار يراننىڭ مەملەكەتتىك IRIB تەلەارناسى ەلدىڭ وڭتۇستىگىندەگى دجيروفت قالاسىنىڭ اۋەجايىنا امەريكالىق سوققى جاسالعانىن حابارلادى.
ال جارتىلاي رەسمي Tasnim اگەنتتىگى كەشم ارالىندا، سونداي-اق كوناراك پەن بەندەر-ابباس پورتتارىندا بىرنەشە جارىلىس بولعانىن جازدى.
