يران سوڭعى ەكى ايدا العاش رەت مۇناي ەكسپورتىن قايتا باستادى. بۇل تۋرالى بۇگىن، 17 ماۋسىمدا CNN تەلەارناسى ايتتى، دەپ حابارلايدى «ادىرنا» ءتىلشىسى.
تەڭىز تاسىمالدارىن باقىلايتىن TankerTrackers تالداۋ كومپانياسىنىڭ مالىمەتىنشە، يراندىق تانكەرلەر مۇنايدىڭ ەكى پارتياسىن ءساتتى ەكسپورتتاپ ۇلگەرگەن.
سپۋتنيكتىك سۋرەتتەرمەن راستالعان دەرەكتەرگە سايكەس، يراننىڭ مەملەكەتتىك تانكەر كومپانياسىنا تيەسىلى ەكى سۋپەرتانكەر شامامەن 3,8 ميلليون باررەل مۇناي تاسىمالداعان.
Kpler دەرەگىنشە، تانكەرلەر اقش اسكەري-تەڭىز كۇشتەرى ورنالاسقان ايماق ارقىلى كەدەرگىسىز وتكەن. بۇعان دەيىن يراننىڭ Fars اگەنتتىگى دە يراندىق كەمەلەردىڭ ورمۇز بۇعازىنداعى اقش بلوكاداسى ايماعىنان وتكەنىن حابارلاعان ەدى.
ەسكە سالايىق، 15 ماۋسىمدا اقش پرەزيدەنتى دونالد ترامپ يرانمەن كەلىسىمگە قول قويىلعانىن جانە ورمۇز بۇعازىندا كەمە قاتىناسى ءىشىنارا قالپىنا كەلتىرىلگەنىن مالىمدەگەن ەدى. ونىڭ ايتۋىنشا، بۇعاز تولىقتاي 19 ماۋسىمدا اشىلادى دەپ كۇتىلۋدە. ترامپ سونداي-اق بۇعازدىڭ قازىردىڭ وزىندە ءىشىنارا اشىلعانىن، كەمە قوزعالىسى بىرتىندەپ جاندانىپ جاتقانىن ايتقان.
بۇعان دەيىن يران اقش-پەن كەلىسسوزدەردى جالعاستىرۋ كەزەڭىندە 60 كۇندىك جەڭىلدىك مەرزىمىن بەرگەنى حابارلانعان. وسى ۋاقىت ارالىعىندا تەگەران بۇعاز ارقىلى قاۋىپسىز ءوتۋ ءۇشىن اقى المايدى. جوباعا سايكەس، تەڭىز تاسىمالدارىن باسقارۋداعى وكىلەتتىكتەر يران مەن ومان اراسىندا قايتا بولىنەدى، ال وتپەلى كەزەڭ اياقتالعان سوڭ يران ءتيىستى تولەمدەردى الۋ قۇقىعىنا يە بولادى.
سونىمەن قاتار بەيبىت كەلىسىم جوباسىنا اتىستى توقتاتۋ، كەمە قاتىناسىنا قويىلعان شەكتەۋلەردى الىپ تاستاۋ، ورمۇز بۇعازىنىڭ جۇمىسىن تولىق قالپىنا كەلتىرۋ، سانكتسيالاردى جويۋ جانە يران اكتيۆتەرىن بۇعاتتان شىعارۋعا قاتىستى تارماقتار ەنگىزىلگەن.
