بۇگىن، 22 ماۋسىمدا اقش پەن يران اراسىنداعى دەلدالداردىڭ قاتىسۋىمەن وتكەن كەلىسسوزدەردىڭ العاشقى كەزەڭى شۆەيتساريادا اياقتالدى، دەپ حابارلايدى «ادىرنا» ءتىلشىسى.
يران دەلەگاتسياسىنىڭ قۇرامىندا پارلامەنت سپيكەرى موحامماد باگەر گاليباف پەن سىرتقى ىستەر ءمينيسترى ابباس اراكچي بولدى. اقش تاراپىنان كەزدەسۋگە ۆيتسە-پرەزيدەنت دجەي دي ۆەنس, اقش پرەزيدەنتىنىڭ كۇيەۋ بالاسى دجارەد كۋشنەر جانە ارنايى وكىل ستيۆ ۋيتكوفف قاتىستى. ال ەكى ەل اراسىنداعى كەلىسسوزدەرگە پاكىستان مەن كاتار دەلدال بولدى.
Al Hadath دەرەككوزدەرىنىڭ مالىمەتىنشە، يران دەلەگاتسياسى اقش پرەزيدەنتى دونالد ترامپتىڭ قوقان-لوقىسىنا قارسىلىق ءبىلدىرىپ، كەلىسسوز الاڭىنان 80 مينۋتتان كەيىن كەتىپ قالعان. 21 ماۋسىم كەشىندە ترامپ Fox News ارناسىنا بەرگەن سۇحباتىندا تەگەران ورمۇز بۇعازىن جاباتىن بولسا، يراننىڭ «ەل رەتىندە ساقتالمايتىنىن» ەسكەرتكەن.
تاسس اگەنتتىگىنىڭ دەرەككوزى 22 ماۋسىمدا شۆەيتساريادا اقش–يران مەموراندۋمى بويىنشا جوسپارلانعان تەحنيكالىق كونسۋلتاتسيالار وتپەيتىنىن مالىمدەدى. الايدا Axios باسىلىمى ءوز دەرەككوزدەرىنە سىلتەمە جاساپ، يراننىڭ كەلىسسوزدەردەن شىققانى تۋرالى حابارلارعا قاراماستان، كەڭەستەر كۇنى بويى جالعاسقانىن جازدى. باسىلىم مالىمەتىنشە، تەحنيكالىق توپتار كەلىسسوزدەردى اپتانىڭ سوڭىنا دەيىن جالعاستىرۋ ءۇشىن شۆەيتساريادا قالادى.
كەلىسسوز قورىتىندىسى بويىنشا پاكىستان مەن كاتار بىرلەسكەن مالىمدەمە جاساپ، ء«ۇمىت كۇتتىرەتىن ىلگەرىلەۋ» بولعانىن جانە الداعى تەحنيكالىق كونسۋلتاتسيالار ءۇشىن ارنايى تەتىك قۇرىلعانىن حابارلادى. مالىمدەمەدە كەزدەسۋ وڭ ءارى سىندارلى جاعدايدا وتكەندىگى ايتىلعان.
تاراپتار 60 كۇن ىشىندە تۇپكىلىكتى كەلىسىمگە قول جەتكىزۋگە ارنالعان جول كارتاسىن بەكىتكەن. سونداي-اق ەكى ەل اراسىنداعى جانە ليۆانداعى جانجالداردى رەتتەۋ ءۇشىن ۇيلەستىرۋ ورتالىعىن قۇرۋ جونىندە ۋاعدالاسقان. بۇل قۇرىلىم دەلدالداردىڭ قاتىسۋىمەن ليۆانداعى اسكەري ارەكەتتەردى توقتاتۋ تۋرالى كەلىسىمنىڭ ورىندالۋىن باقىلاۋعا باعىتتالادى.
17 ماۋسىمدا اقش پرەزيدەنتى دونالد ترامپ پەن يران پرەزيدەنتى ماسۋد پەزەشكيان ءوزارا تۇسىنىستىك تۋرالى مەموراندۋمعا قاشىقتان قول قويعان بولاتىن. باستاپقىدا كەلىسسوزدەر 19 ماۋسىمدا شۆەيتساريانىڭ بيۋرگەنشتوك ەلدى مەكەنىندە وتەدى دەپ جوسپارلانعان، الايدا كەزدەسۋ كەيىنگە شەگەرىلدى. ترامپ ونىڭ بۇزىلۋىنا يراندى كىنالادى. Financial Times پەن CNN مالىمەتىنشە، كەلىسسوزدەر ءيزرايلدىڭ ليۆانعا جاساعان بىرقاتار سوققىلارىنان كەيىن كەيىنگە قالدىرىلعان.
