پاۆلودار قالاسىندا ءسابيىن اربامەن سەرۋەندەتىپ جۇرگەن ايەلدىڭ باسىنا كوپقاباتتى تۇرعىن ۇيدەن مۇز كەسەگى قۇلاپ، ول جاراقات الدى، دەپ حابارلايدى "ادىرنا" ۇلتتىق پورتالى.
وقيعا بويىنشا قىلمىستىق ءىس قوزعالدى. الدىن الا مالىمەت بويىنشا، وقيعا 8 شىلدە كۇنى نازارباەۆ داڭعىلىنداعى تۇرعىن ۇيلەردىڭ ءبىرىنىڭ ماڭىندا بولعان. زارداپ شەككەن ايەل سول ساتتە ءسابيىن قولاربامەن سەرۋەندەتىپ جۇرگەن.
وقيعا بەينەباقىلاۋ كامەرالارىنا ءتۇسىپ قالعان. الايدا وسى ۋاقىتقا دەيىن مۇز كەسەگىن لاقتىرعان نەمەسە ونىڭ قۇلاۋىنا كىنالى ادام انىقتالماعان. زارداپ شەككەن ايەلدىڭ تۋىستارى كىنالىنى ءوز بەتىنشە ىزدەۋگە ءماجبۇر ەكەنىن حابارلادى. جاريالانعان فوتوسۋرەتتەردەن ايەلدىڭ باسىنا تىگىس سالىنعانى بايقالادى.
پاۆلودار وبلىسى پد حابارلاۋىنشا، اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ دەنساۋلىققا قاساقانا جەڭىل زيان كەلتىرۋ بابىمەن سوتقا دەيىنگى تەرگەۋ باستالدى.
ۆەدومستۆونىڭ مالىمەتىنشە، پوليتسيا قىزمەتكەرلەرى بەينەباقىلاۋ كامەرالارىنداعى جازبالاردى زەردەلەپ، وقيعا كۋاگەرلەرىنەن جاۋاپ الىپ جاتىر.
«وقيعانىڭ بارلىق ءمان-جايى انىقتالۋدا. قۇقىق بۇزۋشىلىققا قاتىسى بار ادامدى انىقتاپ، ونى جاۋاپكەرشىلىككە تارتۋ ءۇشىن جان-جاقتى شارالار جۇرگىزىلىپ جاتىر»، – دەپ حابارلادى پوليتسيا.
سونداي-اق بۇل قىلمىستىق ءىستىڭ پاۆلودار وبلىسى پد باسشىلىعىنىڭ ەرەكشە باقىلاۋىندا ەكەنى اتاپ ءوتىلدى.
