پاۆلودار وبلىسىنىڭ اكىمى اسايىن بايحانوۆ ماس كۇيدە كولىك باسقارعانى ءۇشىن 15 تاۋلىككە اكىمشىلىك قاماۋعا الىنعان تۋعان اپكەسىنە قاتىستى ءوز ۇستانىمىن ءبىلدىردى، دەپ حابارلايدى "ادىرنا" ۇلتتىق پورتالى.
ەكىباستۇز قالالىق سوتى اكىمنىڭ اپكەسى — 53 جاستاعى ايگۇل قۋاندىققىزى بايحانوۆانى قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنىڭ 608-بابىنىڭ 1-بولىگى بويىنشا كىنالى دەپ تانىپ، 15 تاۋلىككە قاماۋعا الۋ جانە 7 جىلعا كولىك جۇرگىزۋ قۇقىعىنان ايىرۋ تۋرالى شەشىم شىعاردى.
وقيعا 4 قاراشا كۇنى كەشكە تىركەلگەن. پوليتسيا قىزمەتكەرلەرى Hyundai Tucson ماركالى اۆتوكولىكتى توقتاتقان كەزدە رولدە شەنەۋنىكتىڭ تۋىسى وتىرعانى انىقتالعان. مەديتسينالىق تەكسەرۋ ناتيجەسىندە ونىڭ جەڭىل ماساڭ كۇيدە بولعانى دالەلدەندى.
سوت وتىرىسىندا ايگۇل بايحانوۆا كولىك باسقارماعانىن، تەك اۆتوكولىكتە وتىرعانىن ايتقان. الايدا سوت بۇل ۋاجدەردى جەتكىلىكسىز دەپ تاۋىپ، اكىمشىلىك جازا تاعايىندادى.
ء«بىزدىڭ مەملەكەت زاڭ مەن ءتارتىپتىڭ ۇستەمدىگىن نەگىزگى قاعيداتتاردىڭ ءبىرى رەتىندە ۇستانادى. زاڭ الدىندا بارلىق ازامات تەڭ. بۇل قاعيدا مەنىڭ اپكەمە دە، وتباسىنىڭ وزگە مۇشەلەرىنە دە قاتىستى»، – دەپ جازدى اكىم جەلىدەگى پاراقشاسىندا.
اكىم جاقىن تۋىسىن قورعاۋعا تىرىسپاعانىن، كەز كەلگەن قۇقىقبۇزۋشىلىققا توزبەۋشىلىك ۇستانىمىن كورسەتكەنىن اتاپ ءوتتى.
