فوتو: تاسس
قازاقستان پرەزيدەنتى قاسىم-جومارت توقاەۆ رەسەي مەن ۋكراينا اراسىنداعى قاقتىعىستى ۋاقىتشا توقتاتۋعا شاقىرىپ، ءوز ۇستانىمىن ايتتى، دەپ حابارلايدى "ادىرنا" ۇلتتىق پورتالى.
قازاقستان پرەزيدەنتى توقاەۆ رەسەي باسشىسى پۋتينمەن ومبىدا وتكەن كەزدەسۋدە ەكى ەل اراسىنداعى قاقتىعىسقا توقتالدى.
مەملەكەت باسشىسى قازاقستاننىڭ بەيبىتشىلىك پەن ديالوگتى قولدايتىنىن ايتتى.
«قازاقستان بوتەن ەل ەمەس. دەگەنمەن ءتۇرلى ۇسىنىستارعا قاراماستان، مەن ارااعايىن بولۋدان ءۇزىلدى-كەسىلدى باس تارتامىن. ويتكەنى رەسەي – ۇلى مەملەكەت، ال ورىس حالقى – ۇلى حالىق. سوندىقتان كۇن تارتىبىندەگى ماسەلەلەردى رەسەيدىڭ ءوزى سىرتقى ارااعايىنسىز-اق شەشە الادى دەپ ەسەپتەيمىن»، – دەدى قاسىم-جومارت توقاەۆ.
سونىمەن قاتار پرەزيدەنت رەسەي مەن ۋكراينا اراسىنداعى اسكەري ءىس-قيمىلداردى توقتاتۋدىڭ ماڭىزدىلىعىنا توقتالىپ، قاقتىعىستىڭ جاعدايى تۋرالى ايتتى.
"بۇل جەردە قانداي دا ءبىر ازاماتتىق سوعىس تۋرالى ءسوز بولىپ وتىرعان جوق. ءبىز ۋكراين حالقىنا، ونىڭ مادەنيەتى مەن تىلىنە ءاردايىم قۇرمەتپەن قارادىق. سوندىقتان بۇل قاقتىعىستىڭ تابيعاتى كوپشىلىككە، سونىڭ ىشىندە بىزگە دە تولىق تۇسىنىكتى ەمەس دەپ ەسەپتەيمىز. مىسالى، ازەربايجان مەن ارمەنيا اراسىنداعى، ونىڭ ىشىندە ۇزاق ۋاقىتقا سوزىلعان قاقتىعىستىڭ ءمانى مەن شىعۋ توركىنى بىزگە انىق ەدى. ويتكەنى ونىڭ تاريحي سەبەپتەرى تەرەڭدە جاتىر. ال بۇل جاعدايدىڭ ءمانىن ءتۇسىنۋ الدەقايدا قيىن", - دەدى پرەزيدەنت.
مەملەكەت باسشىسى ءوز سوزىندە 2022 جىلى ىستامبۇلدا وتكەن كەلىسسوزدەردىڭ ناتيجەلەرىنە سۇيەنەتىن «ىستامبۇل فورمۋلاسى 2.0» نۇسقاسىن قاراستىرۋدى ۇسىندى.
«مۇمكىن، بۇل قاقتىعىستى ۋاقىتشا توقتاتىپ، ىستامبۇل فورمۋلاسى 2.0-گە قايتا ورالۋ كەرەك شىعار. ويتكەنى سول كەزدە ايتارلىقتاي ناتيجەلەرگە قول جەتكىزىلگەن ەدى»، – دەدى پرەزيدەنت قاسىم-جومارت توقاەۆ.
وسىلايشا، مەملەكەت باسشىسى قازاقستاننىڭ سىرتقى ساياساتتاعى ۇستانىمى بەيبىت ديالوگتى قولداۋعا باعىتتالعانىن، سونىمەن بىرگە ەلدىڭ حالىقارالىق داۋلاردا اراعايىندىق ميسسيانى ءوز موينىنا المايتىنىن اتاپ ءوتتى.
ريا اگەنتتىگىنىڭ مالىمەتىنشە، رەسەي باسشىسى بۇل ماسەلە بويىنشا قازاقستان پرەزيدەنتىنە جەكە كەزدەسۋ بارىسىندا جان-جاقتى اقپارات بەرەتىنىن ايتقان. «ۋكراينا باعىتىنا قاتىستى ايتاتىن بولساق، بۇگىنگى اڭگىمەمىز بارىسىندا سىزگە بۇل جونىندە تولىق مالىمەت بەرەمىن»، – دەگەن ۆلاديمير پۋتين.
