مەملەكەتتىك كەڭەسشى ەرلان قارين ءوزىنىڭ Telegram ارناسىندا وسىدان تۋرا ءبىر جىل بۇرىن بولعان قاسىرەتتى قانتار وقيعاسىنا قاتىستى جازبا جاريالادى، دەپ جازادى "ادىرنا" ۇلتتىق پورتالى.
«وسىدان ءبىر جىل بۇرىن قايعىلى قاڭتار وقيعاسى بولدى. سول كۇندەرى تەرىس كۇشتەر بەيبىت شەرۋلەردى پايدالانىپ، جاپپاي تارتىپسىزدىكتەر ۇيىمداستىرىپ، مەملەكەتتىك توڭكەرىس جاساۋعا تىرىستى. ولاردىڭ باستى ماقساتى - جۇرگىزىلىپ جاتقان جاڭاشىلدىقتارعا توسقاۋىل بولىپ، ەسكى تارتىپتەردى ساقتاپ قالۋ ەدى. سول ساتتە ءبىزدىڭ ەلىمىز حاوس پەن انارحياعا ءتۇسىپ كەتۋدىڭ ناقتى قاۋپىنە تاپ بولدى. ءار مينۋت ماڭىزدى ەدى. بۇل ۋاقىتتا باستى ماسەلە مەملەكەتتىگىمىزدى ساقتاپ قالۋ بولدى. ازاماتتاردىڭ بىرلىگى مەن پرەزيدەنتتىڭ شەشۋشى ارەكەتىنىڭ ارقاسىندا مەملەكەتتىك توڭكەرىس ارەكەتى ءساتسىز اياقتالدى. ءبىز ۇلتتىق اپاتتى بولدىرماي، جاعدايدى تۇراقتاندىرا الدىق»، - دەپ جازدى ەرلان قارين.
مەملەكەتتىك كەڭەسشىنىڭ ايتۋىنشا، ەندىگى كەزەكتە جوسپارلانعان رەفورمالاردى تولىق جۇزەگە اسىرۋعا كىرىسۋىمىز قاجەت.
«مۇنداي داعدارىستاردى باستان وتكەرگەن مەملەكەتتەردىڭ بيلىگى ادەتتە جاعدايدى جابىق ۇستاۋعا، ساياسي جۇيەنى مىعىمداۋعا نەمەسە قاتاڭ ءتارتىپ ەنگىزۋگە تىرىسادى. بۇل ورايدا، ەلىمىزدەگى ليبەراليزاتسيا مەن دەموكراتياعا باعىتتالعان قوزعالىس توقتاپ قالمادى، كەرىسىنشە ول ۇدەي ءتۇستى. پرەزيدەنتتىڭ باستاماسىمەن ەلىمىزدە قارقىندى جانە جان-جاقتى جاڭعىرتۋ پروتسەسى باستالدى. مەملەكەت باسشىسىنىڭ ستراتەگيالىق باعىتى قوعامنىڭ قولداۋىنا يە بولدى. مۇنى كونستيتۋتسيالىق رەفەرەندۋم مەن كەزەكتەن تىس پرەزيدەنت سايلاۋىنىڭ ناتيجەلەرى دالەلدەيدى. ەندى ءبىزدىڭ الدىمىزدا قوعام بىرلىگىن ساقتاي وتىرىپ، جوسپارلانعان رەفورمالار لەگىن تولىق جۇزەگە اسىرۋ مىندەتى تۇر»، - دەپ ءمالىم ەتتى مەملەكەتتىك كەڭەسشى.
"ادىرنا" ۇلتتىق پورتالى
