استانادا الەۋمەتتىك جەلىدە اسكەردە زورلىق-زومبىلىق كورگەنى تۋرالى جالعان اقپارات تاراتىپ، ازاماتتاردان اقشا جيناعان 23 جاستاعى تۇرعىن ءۇش جىلعا باس بوستاندىعىنان ايىرىلدى، دەپ حابارلايدى "ادىرنا" ءتىلشىسى.
تەرگەۋ مالىمەتىنشە، ول بيىل اقپان ايىندا ءانونيمدى جازبا جاريالاپ، شەتەلگە كەتۋ ءۇشىن قارجىلاي كومەك قاجەت ەكەنىن ايتىپ، بانك رەكۆيزيتتەرىن كورسەتكەن. الايدا جەلى قولدانۋشىلارىنىڭ ءبىرى قۇقىق قورعاۋ ورگاندارىنا شاعىمدانعاننان كەيىن جۇرگىزىلگەن تەكسەرىس بارىسىندا ونىڭ اسكەردە مۇلدە قىزمەت ەتپەگەنى جانە جاريالاعان مالىمەتتەرىنىڭ شىندىققا سايكەس كەلمەيتىنى انىقتالعان.
سونداي-اق كۇدىكتىنىڭ اقشا جيناۋ ءۇشىن بۇل جاعدايدان حابارسىز 17 جاستاعى تانىسىنىڭ بانكتىك شوتىن پايدالانعانى بەلگىلى بولدى. ەكى كۇن ىشىندە كورسەتىلگەن ەسەپشوتقا 15-تەن استام اقشا اۋدارىمى تۇسكەن.
تەرگەۋ بارىسىندا ايىپتالۋشى قارجىلاي پايدا تابۋ ماقساتىندا جالعان اقپارات تاراتقانىن تولىق مويىنداعان.
سوت ونى الاياقتىق جانە كورىنەۋ جالعان اقپارات تاراتۋ باپتارى بويىنشا كىنالى دەپ تانىپ، ءۇش جىلعا باس بوستاندىعىنان ايىرۋ جازاسىن تاعايىندادى.
پوليتسيا ازاماتتاردى الەۋمەتتىك جەلىلەردەگى تەكسەرىلمەگەن اقپاراتقا سەنبەۋگە جانە بەيتانىس ادامداردىڭ ەسەپشوتىنا اقشا اۋدارماۋعا شاقىردى.
