ازيا ويىندارىندا مارەگە ءبىرىنشى بولىپ جەتكەنىمەن، كەيىن جارىس ناتيجەسى جويىلعان قازاقستاندىق جەڭىل اتلەت ياسمينا توقسانباەۆاعا ءبىر بولمەلى پاتەر تابىستالدى، دەپ حابارلايدى "ادىرنا".
باسپانانى قازاقستان جەڭىل اتلەتيكا فەدەراتسياسى مەن دەمەۋشىلەر سىيلاعان. پاتەر كىلتى ازيا ويىندارى مەن ازيا پارا ويىندارىنا قاتىسقان سپورتشىلاردى ماراپاتتاۋ راسىمىندە بەرىلدى. ال وزگە سپورتشىلار مەن جاتتىقتىرۋشىلار اقشالاي سەرتيفيكاتتارمەن ماراپاتتالدى.
فەدەراتسيا وكىلدەرى جارىس ناتيجەسى جويىلعانىنا قاراماستان، ياسمينا توقسانباەۆانى ازيا ويىندارىنىڭ ناعىز چەمپيونى دەپ سانايتىنىن مالىمدەدى. سونداي-اق بۇل قولداۋ سپورتشىنىڭ الداعى وليمپيادا ويىندارىنا دايىندىعىنا سەپتىگىن تيگىزەتىنىن اتاپ ءوتتى.
بۇعان دەيىن سپورتشىنى 9 قاراشا كۇنى پرەزيدەنت توقاەۆ "ەرەن ەڭبەگى ءۇشىن" مەدالىمەن ماراپاتتاعان.
ەسكە سالايىق، 27 قىركۇيەكتە جاپونيادا وتكەن ازيا ويىندارىندا ياسمينا توقسانباەۆا سپورتتىق جۇرىستەن 42 شاقىرىمنان استام قاشىقتىقتى 3 ساعات 22 مينۋت 20 سەكۋندتا ءجۇرىپ ءوتىپ، مارەگە ءبىرىنشى بولىپ كەلگەن. الايدا جارىستان كەيىن تورەشىلەر ونىڭ اياقكيىمىن تەكسەرىپ، World Athletics ۇيىمى بەكىتكەن تالاپتارعا سايكەس كەلمەيتىنىن انىقتاعان. وسىعان بايلانىستى سپورتشىنىڭ ناتيجەسى جويىلدى.
