Франция ұлттық футбол құрамасының бас бапкері Дидье Дешам қызметінен кетті. Бұл туралы Франция футбол федерациясы ресми мәлімдеді, деп хабарлайды "Адырна".
Федерация Дешамға 2012 жылдан бері ұлттық құрамадағы еңбегі үшін алғыс білдіріп, оның француз футболының дамуына қосқан үлесін жоғары бағалады.
«Дидье Дешам тәртіптің, талапшылдықтың, бірліктің және Франция құрамасының көк жейдесіне деген адалдықтың символына айналды. Оның жетекшілігімен ұлттық құрама 2018 жылы әлем чемпионы атанып, 2021 жылы Ұлттар лигасын жеңіп алды. Сондай-ақ бірнеше мәрте ірі халықаралық турнирлердің финалына шығып, әлемдік футболдағы көшбасшы командалардың бірі ретінде тұрақты нәтижелер көрсетті», – делінген федерация хабарламасында.
Ресми мәліметке сәйкес, Дешам бас бапкер ретінде Франция құрамасын 185 матчқа бастап шығып, оның 120-сында жеңіске жеткен. Ол тек жоғары нәтижелерге қол жеткізіп қана қоймай, жеңіске деген ұмтылыс пен жауапкершілік мәдениетін қалыптастырып, кейінгі буынға үлгі болатын мұра қалдырды.
Федерацияның атап өтуінше, Дешам халықаралық деңгейдегі көптеген футболшының қалыптасуына ықпал етіп, әр буынды ортақ құндылықтар төңірегіне топтастыра білді. Сонымен қатар ол жанкүйерлер мен ұлттық құраманың арасындағы байланысты нығайтуға зор үлес қосты.
Дидье Дешам 1998 жылғы әлем чемпионаты мен 2000 жылғы Еуропа чемпионатында Франция құрамасының капитаны ретінде жеңіске жетсе, араға жиырма жыл салып, 2018 жылы дәл сол құраманы әлем чемпионы атандырған бапкер ретінде тарихқа енді.
«Ойыншы ретінде де, бас бапкер ретінде де Франция құрамасына осындай адалдықпен қызмет еткен жандар өте аз. Оның еңбегі Клерфонтендегі ұлттық оқу-жаттығу базасында ғана емес, миллиондаған жанкүйердің жүрегінде мәңгі сақталады. Франция футбол федерациясы оған шынайы алғысын білдіреді. Рақмет, Дидье!» – деп қорытындылады федерация.
