اتىراۋدان اقتوبەگە باعىت العان جولاۋشىلار پويىزىندا بيلەتسىز مىنگەن ەر ادامنىڭ جول ۇستىندە كەنەتتەن قايتىس بولۋىنا بايلانىستى قىزمەتتىك تەكسەرىس جۇرگىزىلىپ، ونىڭ قورىتىندىسى بويىنشا پويىز باستىعى مەن ەكى جولسەرىك جۇمىستان شىعارىلدى، دەپ حابارلايدى “ادىرنا” ۇلتتىق پورتالى Kazinform-عا سىلتەپ.
«جولاۋشىلار تاسىمالى» كومپانياسىنىڭ مالىمەتىنشە، قايعىلى وقيعا 2026 جىلعى 13 شىلدەدە №691/692 جولاۋشىلار پويىزى قاندىاعاش–اقتوبە ۋچاسكەسىندە قوزعالىپ كەلە جاتقان كەزدە بولعان.
پويىز باستىعىنىڭ راپورتىندا مارقۇمنىڭ جول ءجۇرۋ بيلەتى بولماعانى كورسەتىلگەن. تەرگەۋ بارىسىندا ونىڭ ۆاگونعا جولسەرىكتىڭ زاڭسىز كىرگىزۋى ارقىلى وتىرعانى انىقتالعان.
كومپانيانىڭ حابارلاۋىنشا، وقيعا بولعان ۆاگون 2023 جىلى شىعارىلعان. ۆاگونداعى كونديتسيونەر قالىپتى رەجيمدە جۇمىس ىستەپ تۇرعان، ال ىشكى تەمپەراتۋرا بەلگىلەنگەن تالاپتارعا تولىق سايكەس بولعان.
پويىز اقتوبە ستانتسياسىنا كەلگەننەن كەيىن مارقۇمنىڭ دەنەسى ءتيىستى پروتسەسسۋالدىق شارالاردى جۇرگىزۋ ءۇشىن قۇزىرلى ورگاندارعا تاپسىرىلدى.
وقيعا بولعان كۇنى تاسىمالداۋشىنىڭ «باتىس» فيليالى ىشكى قىزمەتتىك تەكسەرۋ ۇيىمداستىردى. ناتيجەسىندە ەكى جولسەرىك پەن پويىز باستىعى قىزمەتىنەن بوساتىلدى. سونىمەن قاتار، اقتوبە ۋچاسكەسىنىڭ باستىعى مەن وندىرىستىك وقىتۋ نۇسقاۋشىسىنا قاتاڭ سوگىس بەرىلدى.
قازىرگى ۋاقىتتا اتالعان دەرەك بويىنشا اقتوبە ستانتسياسىنداعى جەلىلىك پوليتسيا ءبولىمى قىلمىستىق ءىس قوزعاپ، تەرگەۋ جۇمىستارىن جۇرگىزىپ جاتىر.
الدىن الا مالىمەت بويىنشا، ەر ادامنىڭ ولىمىنە ەكىجاقتى پنەۆمونيا سەبەپ بولعان. قۇقىق قورعاۋ ورگاندارى قر قىلمىستىق-پروتسەستىك كودەكسىنىڭ 201-بابىنا سايكەس، تەرگەۋ مۇددەسىنە بايلانىستى وزگە مالىمەتتەردىڭ جاريالانبايتىنىن مالىمدەدى.
