اتىراۋ وبلىسىندا پاتسيەنتتەردەن تەگىن كورسەتىلۋى ءتيىس مەديتسينالىق قىزمەت ءۇشىن زاڭسىز اقى العان حيرۋرگ-دارىگەرگە قاتىستى قىلمىستىق ءىس سوتقا جولداندى، دەپ حابارلايدى “ادىرنا”.
قارجىلىق مونيتورينگ اگەنتتىگىنىڭ مالىمەتىنشە، دارىگەر 2023–2025 جىلدار ارالىعىندا «Family Health Clinic» جانە «كيم ۆ.» كلينيكالارىندا ەڭبەك ەتىپ، ۆاريكوز اۋرۋىنا وپەراتسيا جاساعان. الايدا ول بۇل قىزمەتتەردىڭ مىندەتتى الەۋمەتتىك مەديتسينالىق ساقتاندىرۋ ء(مامس) اياسىندا تەگىن كورسەتىلەتىنىن ەمدەلۋشىلەردەن جاسىرعان.
تەرگەۋ بارىسىندا انىقتالعانداي، دارىگەر ءبىر مەديتسينالىق قىزمەت ءۇشىن ەكى رەت تابىس تاپقان. تەگىن جاسالۋى ءتيىس وپەراتسيادان بەيحابار بولعان 42 پاتسيەنت ونىڭ جەكە بانك شوتىنا جالپى سوماسى 8 ميلليون تەڭگەدەن استام قاراجات اۋدارعان.
سونىمەن قاتار، «DamuMed» اقپاراتتىق جۇيەسىنە وپەراتسيالار ءمامس اياسىندا تەگىن كورسەتىلدى دەگەن جالعان مالىمەت ەنگىزىلگەن. سونىڭ نەگىزىندە الەۋمەتتىك مەديتسينالىق ساقتاندىرۋ قورى اتالعان كلينيكالارعا 14,8 ميلليون تەڭگەدەن استام قارجى اۋدارعان.
بۇعان قوسا، حيرۋرگ قىزمەتتىك مىندەتىن ورىنداعانى ءۇشىن ناۋقاستاردان زاڭسىز اقشالاي سىياقى الىپ وتىرعانى انىقتالدى.
قازىرگى ۋاقىتتا سوتقا دەيىنگى تەرگەۋ اياقتالىپ، قىلمىستىق ءىس سوتتىڭ قاراۋىنا جىبەرىلدى. كۇدىكتىگە قاتىستى «ەلدەن كەتپەۋ تۋرالى قولحات» تۇرىندەگى بۇلتارتپاۋ شاراسى قولدانىلعان.
