اتىراۋ قالاسىندا جاسوسپىرىمدەر اراسىنداعى قۇقىق بۇزۋشىلىقتاردىڭ الدىن الۋ جانە ولاردىڭ قاۋىپسىزدىگىن قامتاماسىز ەتۋ ماقساتىندا پوليتسيا قىزمەتكەرلەرى مەن بەلسەندى اكەلەردەن قۇرالعان ەرەكشە پاترۋلدىك توپ جۇمىس ىستەۋدە.
اتىراۋ وبلىسىنىڭ ءبىلىم باسقارماسى مەن پوليتسيا دەپارتامەنتى بىرلەسكەن باستاما – قوعامداعى قۇقىقتىق مادەنيەتتى ارتتىرۋعا، جاستاردىڭ ءتارتىپ بۇزۋ جاعدايلارىن ازايتۋعا باعىتتالعان ماڭىزدى قادام. اتىراۋدىڭ بەلسەندى اكەلەرى “ۇلت بولاشاعى مەن بالا قاۋىپسىزدىگى – بۇگىنگى زاڭ مەن تارتىپتەن باستالادى” دەگەن ۇستانىممەن ءتارتىپ ساقشىلارىمەن بىرگە تۇنگى رەيدتەرگە قاتىسىپ ءجۇر.
جىل باسىنان بەرى تۇنگى ۋاقىتتا اتا-انا قاراۋىنسىز جۇرگەن 5000-نان استام ءجاسوسپىرىم انىقتالعان. بۇل كورسەتكىش كامەلەتكە تولماعانداردىڭ قاۋىپسىزدىگىن باقىلاۋ شارالارىن كۇشەيتۋدىڭ وزەكتىلىگىن ايقىن كورسەتەدى.
تۇنگى رەيد بارىسىندا پوليتسيا قىزمەتكەرلەرى مەن اكەلەر تۇنگى ساعات 23:00-دەن كەيىن كوشەدە ەرەسەكتەردىڭ قاراۋىنسىز جۇرگەن جاسوسپىرىمدەرگە زاڭ تالاپتارىن ءتۇسىندىرىپ، مۇنداي جاعدايلاردىڭ قاۋىپتىلىگى مەن جاۋاپكەرشىلىگى تۋرالى ەسكەرتتى.
سونىمەن قاتار، توپ مۇشەلەرى جاسوسپىرىمدەر ءجيى باراتىن ويىن-ساۋىق ورتالىقتارى مەن ويىن كلۋبتارىنا ارنايى بارىپ، قۇقىقتىق ءتۇسىندىرۋ جۇمىستارىن جۇرگىزدى. مۇنداي پروفيلاكتيكالىق شارالار كامەلەتكە تولماعانداردىڭ قۇقىق بۇزۋشىلىققا بارۋىنا توسقاۋىل قويۋعا جانە ولاردىڭ قاۋىپسىزدىگىن قامتاماسىز ەتۋگە باعىتتالعان.
قوعامدىق قاۋىپسىزدىكتى نىعايتۋعا ارنالعان بۇل باستاما الداعى ۋاقىتتا دا جالعاسپاق.
