قازاقستاندا اۋا تەمپەراتۋراسىنىڭ كۇرت جوعارىلاۋىنا بايلانىستى تسەمەنتبەتون جابىنى بار رەسپۋبليكالىق ماڭىزى بار اۆتوجولدار كۇشەيتىلگەن باقىلاۋعا كوشتى. اپتاپ ىستىقتىڭ اسەرىنەن جامبىل، پاۆلودار جانە تۇركىستان وبلىستارىنداعى بىرنەشە جول ۋچاسكەسىندە تەمپەراتۋرالىق دەفورماتسيالار تىركەلدى، دەپ حابارلايدى "ادىرنا".
18 شىلدەدەگى مالىمەتكە سايكەس، جول قىزمەتتەرى جالپى ۇزىندىعى 1 636,5 شاقىرىمدى قۇرايتىن تسەمەنتبەتون جابىنى بار اۆتوجولداردى تاۋلىك بويى باقىلاۋدا ۇستاپ وتىر.
جوسپارلى تەكسەرۋلەر بارىسىندا ءۇش وڭىردە التى ۋچاسكەدە جول جابىنىنىڭ جوعارى تەمپەراتۋرا سالدارىنان دەفورماتسيالانعانى انىقتالدى. اقاۋ بايقالعان ورىندارعا ارنايى تەحنيكا مەن جول جوندەۋ بريگادالارى جەدەل جىبەرىلدى.
جوندەۋ جۇمىستارىنا 51 مامان مەن قاجەتتى تەحنيكا تارتىلدى. مامانداردىڭ جەدەل ارەكەت ەتۋىنىڭ ارقاسىندا انىقتالعان بارلىق اقاۋ قىسقا ۋاقىت ىشىندە قالپىنا كەلتىرىلىپ، جول قوزعالىسىنىڭ قاۋىپسىزدىگى قامتاماسىز ەتىلدى.
قازىرگى تاڭدا جول قىزمەتتەرى كۇشەيتىلگەن رەجيمدە جۇمىسىن جالعاستىرىپ جاتىر. مامانداردىڭ ايتۋىنشا، اپتاپ ىستىق كەزىندە تسەمەنتبەتون جول جابىنىنىڭ تەمپەراتۋراسى +60...+70 گرادۋسقا دەيىن، كەي جاعدايلاردا ودان دا جوعارى كوتەرىلەدى. سونىڭ سالدارىنان بەتون پليتالارىنىڭ ىشىندە كەرنەۋ پايدا بولىپ، جول جابىنىندا تەمپەراتۋرالىق دەفورماتسيالار ورىن الۋى مۇمكىن.
وسىعان بايلانىستى جولشىلار جاز مەزگىلىندە رەسپۋبليكالىق ماڭىزى بار اۆتوجولداردىڭ تەحنيكالىق جاعدايىن ۇزدىكسىز باقىلاۋدىڭ ماڭىزى زور ەكەنىن اتاپ ءوتتى. بۇل اقاۋلاردى دەر كەزىندە انىقتاپ، جوندەۋ جۇمىستارىن ۋاقىتىلى جۇرگىزۋگە مۇمكىندىك بەرەدى.
