Qazaqstanda aua temperaturasynyŋ kürt joǧarylauyna bailanysty sementbeton jabyny bar respublikalyq maŋyzy bar avtojoldar küşeitılgen baqylauǧa köştı. Aptap ystyqtyŋ äserınen Jambyl, Pavlodar jäne Türkıstan oblystaryndaǧy bırneşe jol uchaskesınde temperaturalyq deformasiialar tırkeldı, dep habarlaidy "Adyrna".
18 şıldedegı mälımetke säikes, jol qyzmetterı jalpy ūzyndyǧy 1 636,5 şaqyrymdy qūraityn sementbeton jabyny bar avtojoldardy täulık boiy baqylauda ūstap otyr.
Josparly tekseruler barysynda üş öŋırde alty uchaskede jol jabynynyŋ joǧary temperatura saldarynan deformasiialanǧany anyqtaldy. Aqau baiqalǧan oryndarǧa arnaiy tehnika men jol jöndeu brigadalary jedel jıberıldı.
Jöndeu jūmystaryna 51 maman men qajettı tehnika tartyldy. Mamandardyŋ jedel äreket etuınıŋ arqasynda anyqtalǧan barlyq aqau qysqa uaqyt ışınde qalpyna keltırılıp, jol qozǧalysynyŋ qauıpsızdıgı qamtamasyz etıldı.
Qazırgı taŋda jol qyzmetterı küşeitılgen rejimde jūmysyn jalǧastyryp jatyr. Mamandardyŋ aituynşa, aptap ystyq kezınde sementbeton jol jabynynyŋ temperaturasy +60...+70 gradusqa deiın, kei jaǧdailarda odan da joǧary köterıledı. Sonyŋ saldarynan beton plitalarynyŋ ışınde kerneu paida bolyp, jol jabynynda temperaturalyq deformasiialar oryn aluy mümkın.
Osyǧan bailanysty jolşylar jaz mezgılınde respublikalyq maŋyzy bar avtojoldardyŋ tehnikalyq jaǧdaiyn üzdıksız baqylaudyŋ maŋyzy zor ekenın atap öttı. Būl aqaulardy der kezınde anyqtap, jöndeu jūmystaryn uaqytyly jürgızuge mümkındık beredı.
