قازاقستاندا 50 مىڭنان استام جۇك كولىگىنىڭ جۇرگىزۋشىسى جۇمىسسىز قالدى، دەپ حابارلايدى «ادىرنا» ۇلتتىق پورتالى Zakon.kz-كە سىلتەمە جاساپ.
جۇرگىزۋشىلەر كولىك پروكۋراتۋراسىنا ۇجىمدىق ارىز جازعان. «كتك» تەلەارناسىنىڭ مالىمەتىنشە، وتكەن اپتادا بىردەن 200-گە جۋىق تاسىمالداۋشى كومپانيانىڭ قىزمەتى توقتاتىلعان. ولاردى جالعان قۇجات پايدالانعان دەپ ايىپتاعان.
ماسەلەنىڭ تۋىنداۋىنا بيىل قاڭتار ايىنان باستاپ جۇك كولىكتەرىنە شەتەلگە شىعۋعا ارنالعان ۆيزالاردىڭ بەرىلمەۋى سەبەپ بولعان. وسىدان كەيىن كەيبىر تاسىمالداۋشىلار رۇقسات قۇجاتتارىن زاڭسىز جولمەن ساتىپ الۋعا ءماجبۇر بولعان.
جۇرگىزۋشىلەردىڭ ايتۋىنشا، شەتەلگە شىعۋ ءۇشىن ءاربىر جۇك كولىگىنە ارنايى رۇقسات قاعازى — ۆيزا قاجەت. ونىڭ قۇنى شامامەن 4 مىڭ تەڭگە. بۇل قۇجاتتاردى كولىك مينيسترلىگى بەرەدى. الايدا بيىلدان باستاپ جۇيە تولىق اۆتوماتتاندىرىلىپ، تەك ونلاين فورماتقا كوشكەن. ناتيجەسىندە قۇجات الۋ كۇردەلەنىپ، كەيبىر جۇرگىزۋشىلەر قارا نارىقتان 100 مىڭ تەڭگەگە دەيىن تولەۋگە ءماجبۇر بولعان.
جۇك تاسىمالداۋشىلاردىڭ ايتۋىنشا، ەگەر ماسەلە شەشىلمەسە، ەلدە ازىق-تۇلىك پەن تۇرمىستىق تاۋارلاردىڭ باعاسى كۇرت ءوسۋى مۇمكىن.
كولىك مينيسترلىگى بۇل جاعدايعا بايلانىستى تۇسىنىكتەمە بەرىپ، الاڭداۋعا نەگىز جوق ەكەنىن مالىمدەدى. ۆەدومستۆونىڭ مالىمەتىنشە، قۇجات بەرۋ ءتارتىبىن كۇشەيتۋ — دەلدالدار مەن زاڭسىز دەلدالدىقتى جويۋ ماقساتىندا قابىلدانعان شارا.
«كومپانيا رۇقسات الا الماسا، بۇل جۇيە ونىڭ بۇزۋشىلىعىن انىقتاعانىن بىلدىرەدى. دەگەنمەن مۇنداي كومپانيالار جۇمىسىن جالعاستىرا الادى. مىسالى، قىتاي، وزبەكستان جانە ەاەو ەلدەرىنە جۇكتەرىن جەتكىزۋگە تىيىم سالىنعان جوق. بۇل باعىتتارعا ارنايى يبر-بلانك قاجەت ەمەس»، — دەدى كولىك جانە كولىك باقىلاۋى كوميتەتى باسقارماسىنىڭ باسشىسى عاني سالماەۆ.
ونىڭ ايتۋىنشا، ەگەر كومپانيالار نەمەسە جۇرگىزۋشىلەر وزدەرىنە قاتىستى ادىلەتسىز شەشىم دەپ ەسەپتەسە، كوميتەتكە رەسمي حات جولداپ، جەكە قاراستىرۋدى سۇراي الادى.
