وبلىس اكىمى ناريمان تورەعاليەۆ كوپقاباتتى ءۇيدىڭ تەرەزەسىنەن قۇلاپ كەتە جازداعان ءتورت جاسار بالانى قۇتقارىپ قالعان پوليتسيا قىزمەتكەرلەرىمەن كەزدەسىپ، قۇرمەت كورسەتتى.
وقيعا 10 شىلدە كۇنى ساعات 14:00 شاماسىندا بولعان. 102 نومىرىنە زاچاگان كەنتى موڭكەۇلى كوشەسىندە ورنالاسقان تۇرعىن ءۇيدىڭ 7-قاباتىنداعى پاتەر تەرەزەسىنە كىشكەنتاي بالانىڭ شىعىپ كەتكەنى تۋرالى شۇعىل حابارلاما ءتۇستى. باتىس قازاقستان وبلىسى پوليتسيا دەپارتامەنتى پاترۋلدىك پوليتسيا باتالونىنىڭ قىزمەتكەرى رىسبەك اگزاموۆ، بايتەرەك اۋداندىق پوليتسيا ءبولىمىنىڭ قىزمەتكەرى رافاەل يشاكاەۆ، ورال قالاسى پوليتسيا باسقارماسىنىڭ قابىلداۋ-تاراتۋ ورنىنىڭ پوليتسيا جۇرگىزۋشىسى باتىربەك سەيىتوۆ جەدەل ارەكەت ەتىپ، بالدىرعاندى اجالدان اراشالاپ قالدى.
ايماق باسشىسى قايعىلى وقيعانىڭ الدىن العان ءتارتىپ ساقشىلارىنا زور ريزاشىلىعىن ءبىلدىردى.
- سىزدەر انتقا ادالدىق پەن كاسىبيلىكتىڭ ۇلگىسىن كورسەتتىڭىزدەر. جەدەل ارەكەتتەرىڭىز ارقىلى بالدىرعانعا ءومىر سىيلادىڭىزدار. ادام ومىرىنە جەتەتىن ەشتەڭە جوق. مۇنداي ەرلىك ەشقاشان ۇمىتىلمايدى. ارينە، بالا قاۋىپسىزدىگى ءۇشىن ءبىرىنشى كەزەكتە اتا-انا جاۋاپتى. قوعامدا ءتۇسىندىرۋ شارالارىن كەڭىنەن جۇرگىزۋىمىز قاجەت. ال سىزدەر الداعى ۋاقىتتا دا «زاڭ مەن ءتارتىپ» قاعيداتىن مۇلتىكسىز ورىنداپ، ەل يگىلىگىنە ايانباي ۇلەس قوسا بەرەتىندەرىڭىزگە سەنەمىن، - دەدى ناريمان تورەعاليەۆ.
وبلىس اكىمى پوليتسيا قىزمەتكەرلەرىنە العىس حات پەن ەستەلىك سىيلىق تابىستادى.
