اقمولا وبلىسىندا پوليتسەيلەر سىرت كيىمسىز ايازدا اداسىپ قالعان ازاماتتى قۇتقاردى، دەپ حابارلايدى «ادىرنا» ءتىلشىسى.
پد مالىمەتىنشە، جەرگىلىكتى ءدامحانالاردىڭ بىرىنەن پوليتسيانىڭ كەزەكشى بولىمىنە قوڭىراۋ تۇسكەن.
«مەرەكەلىك كەشتە قوناقتاردىڭ ءبىرى سىرت كيىمسىز، ءبىر جەيدەمەن دالاعا شىعىپ كەتكەن. سول ساتتە دالادا قاتتى اياز بولعان. ۋاقىت جوعالتپاي پوليتسيا قىزمەتكەرلەرى ىزدەۋ جاريالاپ، بۇلاندى اۋداندىق پوليتسيا ءبولىمىنىڭ جەكە قۇرامىن دابىل بويىنشا كوتەردى. ىزدەۋ جۇمىستارى بىرنەشە كوشە مەن اۋلالاردا قاتار جۇرگىزىلدى. اۋا تەمپەراتۋراسى –30 گرادۋستان تومەن ءتۇسىپ، ەر ادامنىڭ اۋا رايىنا ساي كيىنبەگەنى پوليتسەيلەردى قاتتى الاڭداتتى»،- دەلىنگەن حابارلامادا.
كوپ ۇزاماي جوعالىپ كەتكەن ازاماتتىڭ ششۋچينسك قالاسىنىڭ تۇرعىنى ەكەنى جانە مەرەكەلىك شاراعا كەلگەنى انىقتالدى. الدىن الا مالىمەت بويىنشا، الكوگولدىك ىشىمدىك ىشكەننەن كەيىن ول اداسىپ، بەلگىسىز جاققا كەتىپ قالعان. ەكى ساعاتقا سوزىلعان قارقىندى ىزدەۋ جۇمىستارى ناتيجەسىندە ەر ادام اۋدان كوشەلەرىنىڭ بىرىنەن توڭىپ قالعان ءارى شوك كۇيىندە تابىلدى.
پوليتسەيلەر وعان العاشقى مەديتسينالىق كومەك كورسەتىپ، جىلىتىپ، جاقىندارىنا جەتكىزگەن. كەيىن قۇتقارىلعان ازامات پوليتسيا قىزمەتكەرلەرىنە العىس ءبىلدىرىپ، بەينەۇندەۋ جازعان. ول ەكسترەمالدى اۋا رايى جاعدايىندا ءومىرىن ساقتاپ قالۋعا ءدال وسى پوليتسيا قىزمەتكەرلەرىنىڭ جەدەلدىگى مەن بەيجاي قاراماۋى سەبەپ بولعانىن اتاپ وتكەن.
