Oblys äkımı Nariman Töreǧaliev köpqabatty üidıŋ terezesınen qūlap kete jazdaǧan tört jasar balany qūtqaryp qalǧan polisiia qyzmetkerlerımen kezdesıp, qūrmet körsettı.
Oqiǧa 10 şılde künı saǧat 14:00 şamasynda bolǧan. 102 nömırıne Zachagan kentı Möŋkeūly köşesınde ornalasqan tūrǧyn üidıŋ 7-qabatyndaǧy päter terezesıne kışkentai balanyŋ şyǧyp ketkenı turaly şūǧyl habarlama tüstı. Batys Qazaqstan oblysy polisiia departamentı patruldık polisiia batalonynyŋ qyzmetkerı Rysbek Agzamov, Bäiterek audandyq polisiia bölımınıŋ qyzmetkerı Rafael İşakaev, Oral qalasy polisiia basqarmasynyŋ qabyldau-taratu ornynyŋ polisiia jürgızuşısı Batyrbek Seiıtov jedel äreket etıp, baldyrǧandy ajaldan araşalap qaldy.
Aimaq basşysy qaiǧyly oqiǧanyŋ aldyn alǧan tärtıp saqşylaryna zor rizaşylyǧyn bıldırdı.
- Sızder antqa adaldyq pen käsıbilıktıŋ ülgısın körsettıŋızder. Jedel äreketterıŋız arqyly baldyrǧanǧa ömır syiladyŋyzdar. Adam ömırıne jetetın eşteŋe joq. Mūndai erlık eşqaşan ūmytylmaidy. Ärine, bala qauıpsızdıgı üşın bırınşı kezekte ata-ana jauapty. Qoǧamda tüsındıru şaralaryn keŋınen jürgızuımız qajet. Al sızder aldaǧy uaqytta da «Zaŋ men tärtıp» qaǧidatyn mültıksız oryndap, el igılıgıne aianbai üles qosa beretınderıŋızge senemın, - dedı Nariman Töreǧaliev.
Oblys äkımı polisiia qyzmetkerlerıne alǧys hat pen estelık syilyq tabystady.
