ومبى وبلىسىنىڭ ۇكىمەتى قازاقستان مەن رەسەيدىڭ وڭىرارالىق ىنتىماقتاستىعىنىڭ XXII فورۋمىنىڭ وتەتىن كۇنىن جاريالادى، دەپ حابارلايدى «ادىرنا» ءتىلشىسى
ءىس-شارا 24–25 شىلدەدە وتپەك. فورۋمنىڭ نەگىزگى الاڭى رەتىندە ومبى كونگرەسس-حولى بەلگىلەنگەن.
«فورۋمنىڭ ىسكەرلىك باعدارلاماسىندا ەكىجاقتى ىنتىماقتاستىقتىڭ وزەكتى ماسەلەلەرى بويىنشا پانەلدىك پىكىرتالاستار، جاستار فورۋمى، رەسەي–قازاقستان جانە قازاقستان–رەسەي ىسكەرلىك كەڭەستەرىنىڭ بىرلەسكەن وتىرىسى، سونداي-اق ىسكەرلىك بايلانىستار بيرجاسى جوسپارلانعان. ءداستۇر بويىنشا فورۋم اياسىندا ەكى ەلدىڭ الەۋەتىن تانىستىراتىن مادەني جانە كورمە ءىس-شارالارى ۇيىمداستىرىلادى. رەسەيدىڭ ەكونوميكالىق دامۋ مينيسترلىگى فورۋمدى وتكىزۋگە بەلسەندى دايىندىق جۇرگىزىپ جاتىر. رەسەي مەن قازاقستان وڭىرلەرى اراسىندا ىنتىماقتاستىق تۋرالى قۇجاتتارعا، سونداي-اق كوممەرتسيالىق كەلىسىمدەرگە قول قويۋ كۇتىلۋدە»، – دەلىنگەن «ومبى گۋبەرنياسى» ۇكىمەتتىك پورتالىنىڭ حابارلاماسىندا.
وڭىرارالىق ىنتىماقتاستىقتىڭ الدىڭعى فورۋمى 2025 جىلدىڭ قاراشا ايىندا ورال قالاسىندا وتكەن بولاتىن. ءداستۇر بويىنشا 2026 جىلى بۇل ءىس-شارانى رەسەيدىڭ شەكارالاس قالالارىنىڭ ءبىرى قابىلداۋى ءتيىس ەدى.
2026 جىلدىڭ مامىر ايىندا پرەزيدەنت قاسىم-جومارت توقاەۆ فورۋمنىڭ 20 تامىزدا وتەتىنىن ايتقان ەدى. الايدا وتكەن اپتادا «كوممەرچەسكيە ۆەستي» باسىلىمى فورۋمنىڭ 24–25 شىلدەدە وتەتىنىن مالىمدەگەن. سونىمەن قاتار ەكى ەل پرەزيدەنتىنىڭ ءىس-شاراعا جەكە قاتىسۋى جوسپارلانباعانى ايتىلدى.
مالىمەتكە سايكەس، ۆلاديمير پۋتين مەن قاسىم-جومارت توقاەۆ 25 شىلدەگە بەلگىلەنگەن پلەنارلىق وتىرىسقا بەينەكونفەرەنتسيا بايلانىسى ارقىلى قاتىسپاق.
