قازاقستان پرەزيدەنتى قاسىم-جومارت توقاەۆ يراننىڭ ۇشقىشسىز ۇشۋ اپپاراتتارى ناحچىۆان قالاسىنداعى اۋەجايدى اتقىلاۋىنا بايلانىستى ءوز ۇستانىمىن ءبىلدىردى، دەپ حابارلايدى "ادىرنا" ۇلتتىق پورتالى.
بۇل تۋرالى پرەزيدەنتتىڭ ءباسپاسوز حاتشىسى ايبەك سماديار حابارلادى.
مەملەكەت باسشىسى باۋىرلاس ءارى وداقتاس ازەربايجان ەلىنە قارسى جاسالعان ارەكەتتى قاتاڭ ايىپتايتىنىن مالىمدەدى. پرەزيدەنتتىڭ ايتۋىنشا، بولعان وقيعانىڭ بارلىق ءمان-جايى يران تاراپىمەن بىرلەسىپ جان-جاقتى تەرگەلۋى ءتيىس.
سونداي-اق قاسىم-جومارت توقاەۆ بۇل جاعداي ەكى ەل اراسىنداعى قارىم-قاتىناسقا كەرى اسەر ەتپەۋى قاجەت ەكەنىن اتاپ ءوتتى. پرەزيدەنت ايماقتاعى تۇراقتىلىقتى ساقتاۋ ءۇشىن تۋىنداعان ماسەلە ديپلوماتيالىق تاسىلدەر ارقىلى شەشىلەدى دەگەن سەنىم ءبىلدىردى.
اقوردانىڭ مالىمەتىنشە، قازاقستان ايماقتاعى قاۋىپسىزدىك پەن تۇراقتىلىقتى ساقتاۋدى ماڭىزدى دەپ سانايدى جانە بارلىق داۋلى ماسەلەلەردى بەيبىت جولمەن شەشۋدى قولدايدى.
يران اۋماعىنان ۇشىرىلعان ۇشقىشسىز ۇشۋ اپپاراتى 5 ناۋرىز كۇنى ازەربايجاننىڭ ناحيچەۆان اۋەجايىنا قۇلاعان بولاتىن. سالدارىنان بىرنەشە ادام قازا تاپتى.
