ەڭبەكشىقازاق اۋدانىندا رەفەرەندۋمعا اقساقالدار دا، جاستار دا قاتىسىپ، ۇرپاقتار ساباقتاستىعى مەن ولاردىڭ اراسىنداعى اجىراماس بايلانىستى ايقىن كورسەتۋدە.
ەسىك قالاسىنداعى №125 ۋچاسكەدە جاس وتباسى — ايزات داۋكە مەن اينۇر جۇماباي داۋىس بەردى. ءبىر قىزىعى، جاقىندا عانا رەسمي تۇردە نەكەسىن تىركەگەن جاس جۇبايلار ءدال وسى كۇنى مەشىتتە نەكە قيۋ ءراسىمىن وتكىزۋدى دە ۇيعارعان.
ۋچاسكەگە ايزات پەن اينۇر قول ۇستاسىپ، قۋانىشقا تولى كوڭىل كۇيمەن كەلدى. وتباسى باسشىسى، APL Construction گازبەن قامتۋ كومپانياسىندا جۇمىس ىستەيتىن ايزاتتىڭ ايتۋىنشا، ولاردىڭ بىرگە داۋىس بەرۋى سول كۇنى قابىلداعان جەكە عانا ەمەس، قوعامدىق ماڭىزى بار شەشىمدەردىڭ دە ءمانىن ايقىنداي تۇسەدى.
— بۇگىن ءبىز بىرگە تاڭداۋ جاساپ وتىرمىز. وسى ارقىلى تەك ءوز تاعدىرىمىزدى عانا ەمەس، بولاشاق بالالارىمىزدىڭ دا بولاشاعىن ايقىندايمىز. بۇل ءبىز ءۇشىن وتە تولقىتاتىن ءسات. تاۋەلسىز قازاقستاننىڭ دۇرىس باعىتىن قولداپ، رەفەرەندۋمدا داۋىس بەرگەنىمىزدى ماقتان تۇتامىز. مۇنداي ماڭىزدى وقيعالار ءاربىر ازاماتقا قاتىستى دەپ سانايمىز. بۇل — ءبىزدىڭ تاڭداۋىمىز ءارى جاۋاپكەرشىلىگىمىز، — دەپ ءبولىستى جاس جۇبايلار.
كوميسسيا مۇشەلەرى جاس جۇبايلاردى جىلى قارسى العاننان كەيىن، ولار تىركەۋ راسىمىنەن ءوتىپ، بيۋللەتەندەرىن الدى. سول ساتتە ۋچاسكەدە بولعان ەسىكتىك تۇرعىنداردىڭ ايتۋىنشا، ولاردىڭ ءبىر-بىرىنە دەگەن ءىلتيپاتى مەن قامقورلىعى بىردەن كوپشىلىكتىڭ ىقىلاسىن وياتىپ، جۇزدەرىنە كۇلكى سىيلادى.
داۋىس بەرگەننەن كەيىن ايزات پەن اينۇر وسى ماڭىزدى كۇندى ەستە ساقتاۋ ءۇشىن بىرگە سۋرەتكە ءتۇستى. بۇل ءسات وتباسى ءۇشىن ەرەكشە ماعىناعا يە بولدى. ويتكەنى ول ەل بولاشاعى ەڭ ۇلكەن بۋىننان باستاپ ەڭ جاس ازاماتتارعا دەيىن بارلىعىنىڭ قولىمەن قالىپتاساتىنىن ەسكە سالاتىن سيمۆولدىق كورىنىس ەدى.
ەڭبەكشىقازاق اۋدانىنداعى جاس جۇبايلار وتباسىلىق ءومىردىڭ جاڭا كەزەڭىن ازاماتتىق بورىشىن ورىنداۋمەن ۇشتاستىرۋدى ءجون كوردى. ولار ءۇشىن، بارلىق قازاقستاندىقتار سياقتى، ەل ومىرىندەگى ماڭىزدى ساتتەردەن شەت قالماي، ءوز داۋىس بەرۋ قۇقىعىن پايدالانۋ اسا ماڭىزدى.
