كوكشەتاۋ قالاسىنداعى جاڭا جاعالاۋدا ۇلتتىق دومبىرا كۇنى كەڭ كولەمدە اتالىپ ءوتتى. ايماق تۇرعىندارى مەن قالا قوناقتارى ءداستۇرلى ونەر فەستيۆالىن تاماشالاپ، كورمەلەردى ارالاپ، قازاق مۋزىكاسىنىڭ جاۋھارلارىنا قانىقتى. مەرەكە اياسىندا رەسپۋبليكالىق #DombyraKuni چەللەندجى ۇيىمداستىرىلىپ، وعان ءوڭىردىڭ تانىمال تۇلعالارى، مادەنيەت قايراتكەرلەرى، جاستار مەن تۇرعىندار بەلسەندى قاتىستى.
مەرەكەلىك شارا مادەنيەت مەكەمەلەرى ازىرلەگەن تاقىرىپتىق كورمەلەر مەن تانىستىرىلىم الاڭدارىنىڭ جۇمىسىنان باستالدى. كەلۋشىلەر قازاق حالقىنىڭ رۋحاني مۇراسى، ۇلتتىق سالت-ءداستۇرى مەن كۇي ونەرىنىڭ تاريحىمەن تانىستى. سونداي-اق ۇلتتىق قۇندىلىقتاردى دارىپتەۋگە باعىتتالعان «كونە دومبىرا» جانە «مۋزەيگە جادىگەر سىيلا» رەسپۋبليكالىق اكتسيالارى ۇيىمداستىرىلدى.
كەشتىڭ باستى وقيعاسى – العاش رەت وتكەن «كوكشە – ونەر مارجاندارى» ءداستۇرلى ونەر فەستيۆالى بولدى. فەستيۆال ساحناسىندا ق. كۇمىسبەكوۆ اتىنداعى قازاق حالىق اسپاپتار وركەسترى، ءداستۇرلى انشىلەر مەن كۇيشىلەر ونەر كورسەتتى. باعدارلامادا ۇكىلى ىبىرايدىڭ «ەر كوكشە»، اقان سەرىنىڭ «مايدا قوڭىر» سىندى اندەرى شىرقالىپ، حالىق كومپوزيتورلارىنىڭ كۇيلەرى ورىندالدى.
مەرەكەلىك جيىندا اقمولا وبلىسى اكىمىنىڭ ورىنباسارى دوسۇلان ايتباەۆ اقمولالىقتاردى ۇلتتىق دومبىرا كۇنىمەن قۇتتىقتاپ، دومبىرانىڭ ۇلت ومىرىندەگى ەرەكشە ورنىنا توقتالدى.
«قازاق پەن دومبىرا – ەگىز ۇعىم. دومبىرا – قازاقتىڭ جانى، ۇلتتىڭ ءۇنى. قاسيەتتى كوكشە – ءان مەن كۇيدىڭ، سال-سەرىلەر ءداستۇرىنىڭ التىن بەسىگى. جۋىردا مەملەكەت باسشىسى قاسىم-جومارت توقاەۆتىڭ وڭىرگە ساپارى كەزىندە جاس دومبىراشىلاردىڭ ونەرىنە جوعارى باعا بەرۋى – ۇلتتىق ونەرىمىزدىڭ ومىرشەڭدىگىنىڭ ايقىن كورىنىسى. سوندىقتان بۇل اسىل مۇرانى ساقتاپ، جاس ۇرپاققا جەتكىزۋ – بارشامىزدىڭ ورتاق مىندەتىمىز»، – دەدى دوسۇلان ايتباەۆ.
بيىلعى مەرەكەنىڭ تاعى ءبىر ەرەكشەلىگى – الەۋمەتتىك جەلىلەردە وتكەن رەسپۋبليكالىق #DombyraKuni چەللەندجى بولدى. يگى باستاماعا ءوڭىردىڭ تانىمال تۇلعالارى، مادەنيەت سالاسىنىڭ وكىلدەرى، شىعارماشىلىق ۇجىمدار، جاس دومبىراشىلار، ستۋدەنتتەر مەن تۇرعىندار بەلسەندى اتسالىستى. قاتىسۋشىلار الەۋمەتتىك جەلىلەردە دومبىرامەن كۇي ورىنداپ، ۇلتتىق اندەردى شىرقاپ، ەستافەتانى ءبىر-بىرىنە جولداپ وتىردى. چەللەندجدىڭ باستى ماقساتى – جاستار اراسىندا ۇلتتىق ونەردى دارىپتەۋ، دومبىرانىڭ مارتەبەسىن ارتتىرۋ جانە ۇلتتىق مۇراعا دەگەن قۇرمەتتى نىعايتۋ.
مەرەكەلىك كەشتە قازاقستاننىڭ ەڭبەك سىڭىرگەن ءارتىسى بيسارا ماكەنوۆا دا كوپشىلىكتى ۇلتتىق دومبىرا كۇنىمەن قۇتتىقتاپ، ۇلتتىق اسپاپتىڭ قازاق رۋحانياتىنداعى ورنى ەرەكشە ەكەنىن اتاپ ءوتتى.
«دومبىرا – حالقىمىزدىڭ قاسيەتتى قازىناسى، ۇلت رۋحىنىڭ ماڭگىلىك سيمۆولى. ونىڭ قوڭىر ۇنىمەن حالقىمىزدىڭ تاريحى، قۋانىشى مەن مۇڭى، ارمان-اڭسارى ۇرپاقتان ۇرپاققا جالعاسىپ كەلەدى. بۇگىندە ءداستۇرلى ءان مەن كۇيگە دەگەن قۇرمەتتىڭ ارتۋى – ۇلتتىق قۇندىلىقتارعا دەگەن سۇيىسپەنشىلىكتىڭ ايقىن كورىنىسى. قاسيەتتى قارا دومبىرانىڭ ءۇنى ەشقاشان ۇزىلمەي، جاس ۇرپاقتى ەلىن، جەرىن، ونەرىن سۇيۋگە تاربيەلەي بەرسىن»، – دەدى بيسارا ماكەنوۆا.
مەرەكەلىك كەش مىڭداعان كورەرمەننىڭ قوشەمەتىنە بولەنگەن گالا-كونتسەرتپەن قورىتىندىلاندى. كوكشەنىڭ كوركەم جاعالاۋىندا كۇمبىرلەگەن كۇي مەن اۋەلەگەن ءان ۇلتتىق ونەردىڭ ومىرشەڭدىگىن تاعى ءبىر مارتە ايعاقتاپ، كوپشىلىككە ەرەكشە اسەر سىيلادى. ۇلتتىق دومبىرا كۇنى اقمولا وڭىرىندە ءتول مادەنيەتتى ۇلىقتاپ، ۇرپاقتار ساباقتاستىعىن دارىپتەگەن تاعىلىمدى مەرەكە رەتىندە ەستە قالدى.
