تۇركيا پرەزيدەنتى اكىمشىلىگىنىڭ كوممۋنيكاتسيالار باسقارماسىنىڭ باسشىسى بۋرحانەتتين دۋران يزرايل بيلىگىنىڭ 1915 جىلعى وقيعالارعا قاتىستى شەشىمىن قاتاڭ سىنعا الدى، دەپ حابارلايدى «ادىرنا» ءتىلشىسى Anadolu Ajansı-گە سىلتەمە جاساپ.
ول يزرايل ۇكىمەتىنىڭ 1915 جىلعى وقيعالاردى «ارميان گەنوتسيدى» دەپ تانۋ تۋرالى شەشىمىنە جەلىدەگى پاراقشاسىندا پىكىر ءبىلدىردى.
«XXI عاسىرداعى ەڭ قاتىگەز جاپپاي قىرعىنداردىڭ ءبىرىن جاساعان، بالالاردى، ايەلدەردى جانە قارتتاردى قوسا العاندا، ونداعان مىڭ بەيبىت تۇرعىننىڭ ءومىرىن قيعان يزرايل باسشىلىعىنىڭ تاريحي وقيعالاردى ساياسي قارۋ رەتىندە پايدالانۋعا باتىلى جەتۋى – ەكىجۇزدىلىكتىڭ ايقىن كورىنىسى»، – دەدى باسشى.
دۋراننىڭ ايتۋىنشا، ءيزرايلدىڭ 1915 جىلعى وقيعالاردى «گەنوتسيد» دەپ تانۋى – جازىقسىز پالەستينالىقتاردىڭ قانىنا قاتىستى جاۋاپكەرشىلىكتى، تاياۋ شىعىستا جۇرگىزىپ وتىرعان مەملەكەتتىك تەرروردى جانە ادامزاتقا قارسى جاسالعان قىلمىستاردى بۇركەمەلەۋگە باعىتتالعان ناتيجەسىز ارەكەت.
سونداي-اق ول بۇگىنگى كۇنى حالىقارالىق قۇقىق نورمالارىن ورەسكەل بۇزىپ، اۋرۋحانالاردى، مەكتەپتەردى، عيبادات ورىندارىن جانە بوسقىندار لاگەرلەرىن ۇزدىكسىز بومبالاپ وتىرعان مەملەكەتتىڭ مورالدىق جانە تاريحي جاۋاپكەرشىلىك تۋرالى ءسوز قوزعاۋىن «ادامزات تاريحىنداعى ەڭ ۇلكەن يرونيالاردىڭ ءبىرى» دەپ اتادى.
«گەنوتسيد جاسادى دەگەن ايىپپەن حالىقارالىق سوت الدىندا جاۋاپ بەرىپ وتىرعانداردىڭ تۇركياعا تاريحتان ءدارىس وقۋعا نەمەسە ار-وجداننىڭ قورعاۋشىسى رەتىندە سويلەۋگە ەشقانداي قۇقىعى جوق»، – دەپ تۇيىندەدى دۋران.
ەسكە سالايىق، بۇعان دەيىن ءيزرايلدىڭ ەلدىڭ سىرتقى ىستەر ءمينيسترى گيدەون ساار ۇسىنعان وسمان يمپەرياسىنداعى "ارميان گەنوتسيدىن" تانۋ تۋرالى ۇسىنىستى ماقۇلداعانىن جازعان ەدىك.
