باس پروكۋراتۋرا ينتەرپول قىزمەتكەرلەرى جانە قازاقستاننىڭ تۇركياداعى ەلشىلىگىنىڭ قولداۋىمەن انتاليا قالاسىنان قازاقستان ازاماتىن قىلمىستىق جاۋاپتىلىققا تارتۋ ءۇشىن ەكستراديتسيالادى، دەپ حابارلايدى «ادىرنا» ءتىلشىسى.
ەر ادام بىرنەشە رەت اسا ءىرى مولشەردە الاياقتىق جاساعان دەگەن كۇدىككە ىلىنگەن. تەرگەۋ دەرەكتەرىنە سايكەس، ول 2019–2020 جىلدارى الداۋ جولىمەن شىمكەنت قالاسىنىڭ 4 جابىرلەنۋشى-تۇرعىنىنىڭ اقشالاي قاراجاتى مەن جەر ۋچاسكەلەرىن يەمدەنىپ، ولارعا جيىنتىعىندا شامامەن 95 ملن تەڭگە كولەمىندە زالال كەلتىرگەن.
جابىرلەنۋشىلەردىڭ اقشالاي قاراجاتىن يەمدەنگەننەن كەيىن، زاڭمەن بەلگىلەنگەن جاۋاپتىلىقتان جالتارۋ ماقساتىندا كۇدىكتى بوي تاسالاعان. وسىعان بايلانىستى حالىقارالىق ىزدەۋگە جاريالانعان.
كەيىننەن ول تۇركيا اۋماعىندا ۇستالىپ، باس پروكۋراتۋرانىڭ سۇراۋ سالۋى نەگىزىندە وتانىنا ەكستراديتسيالانعان. قازىرگى ۋاقىتتا ول تەرگەۋ يزولياتورىنا قامالدى.
ايىپ تاعىلعان قىلمىستار ءۇشىن قىلمىستىق زاڭنامادا مۇلكى تاركىلەنىپ، 7 جىلدان 12 جىلعا دەيىن باس بوستاندىعىنان ايىرۋ جازاسى كوزدەلگەن.
