تۇركيا يران اۋماعىنان ۇشىرىلىپ، ەلدىڭ اۋە كەڭىستىگىنە باعىتتالعان بالليستيكالىق زىمىراندى اتىپ ءتۇسىردى. بۇل تۋرالى ۇلتتىق قورعانىس مينيسترلىگى جازدى، دەپ حابارلايدى «ادىرنا» ءتىلشىسى.
مينيسترلىك مالىمەتىنشە، زىمىران يراك پەن سيريانىڭ اۋە كەڭىستىگى ارقىلى ءوتىپ، كەيىن شىعىس جەرورتا تەڭىزىندە ورنالاستىرىلعان ناتو-نىڭ اۋە جانە زىمىرانعا قارسى قورعانىس كۇشتەرى تاراپىنان جويىلعان.
حاتاي پروۆينتسياسى ديورتيول اۋدانىنا تۇسكەن بولشەك بالليستيكالىق زىمىراندى كوكتە جويۋ كەزىندە قولدانىلعان توسقاۋىل زىمىرانعا تيەسىلى ەكەنى ايتىلدى. وقيعا سالدارىنان قازا تاپقاندار مەن زارداپ شەككەندەر جوق.
انكارا تۇركيانىڭ ءوز اۋماعى مەن اۋە كەڭىستىگىن قورعاۋ ءۇشىن بارلىق قاجەتتى شارانى قابىلداۋعا نيەتتى ەكەنىن اتاپ ءوتتى.
«تۇركيا وڭىرلىك تۇراقتىلىق پەن بەيبىتشىلىكتى قولدايدى. الايدا قاۋىپ قاي تاراپتان جانە قاي جەردەن تونسە دە، مەملەكەتىمىز ءوز اۋماعى مەن ازاماتتارىنىڭ قاۋىپسىزدىگىن قامتاماسىز ەتۋگە قاۋقارلى. جەرىمىز بەن اۋە كەڭىستىگىمىزدى قورعاۋعا باعىتتالعان كەز كەلگەن قادام باتىل ءارى كىدىرىسسىز جۇزەگە اسىرىلادى. ەلىمىزگە قارسى جاسالعان كەز كەلگەن دۇشپاندىق ارەكەتكە جاۋاپ بەرۋ قۇقىعىن وزىمىزدە قالدىرامىز»، — دەلىنگەن قورعانىس مينيسترلىگىنىڭ مالىمدەمەسىندە.
سونداي-اق قۇجاتتا تۇركيانىڭ وڭىرلىك تۇراقتىلىق پەن بەيبىتشىلىكتى ساقتاۋدى قولدايتىنى، تاراپتاردى شيەلەنىستىڭ ودان ءارى ۋشىعۋىنا اكەلۋى مۇمكىن ارەكەتتەردەن باس تارتۋعا شاقىراتىنى ايتىلعان. وسى تۇرعىدا ەل ناتو جانە وزگە دە وداقتاستارىمەن كەڭەسۋدى جالعاستىرماق.
