قازاقستان ۇكىمەتىنىڭ باسشىسى ءاليحان سمايلوۆ پەن اقش ەلشىسى دەنيەل روزەنبليۋم كەزدەستى. ولار قازاقستان مەن اقش اراسىنداعى سەرىكتەستىك جايىن تالقىلادى، دەپ حابارلايدى "ادىرنا" ۇلتتىق پورتالى.
كەزدەسۋ بارىسىندا پرەمەر-مينيستر ءاليحان سمايلوۆ قازاقستاننىڭ اقش-تى قوس تاراپتى عانا ەمەس، كوپباعىتتى سالادا سەرىكتەس سانايتىندىعىن اتاپ ءوتتى.
سونىمەن قاتار، قازاقستان اۋماعىندا بۇگىنى 900-دەن استام بىرلەسكەن كاسىپورىن جۇمىس ىستەيتىندىگىن حابارلادى. قوس ەل اراسىنداعى تاۋار اينالىمى وتكەن جىلى، شامامەن، 40%-عا ءوسىپ، 3,1 ميلليارد دوللارعا جەتكەنىن ايتتى. ال امەريكالىق ينۆەستيتسيالار اعىنى 2 ەسەگە ارتىپ، 5,1 ميلليارد دوللاردان اسقانىن مالىمدەدى.
سمايلوۆتىڭ حابارلاۋىنشا، قازاقستان ساۋدا كولەمىن ۇلعايتۋدىڭ مول مۇمكىندىگىن ەسكەرىپ وتىر. الداعى ۋاقىتتا 90 تاۋار تارماعى بويىنشا ساۋدا قارقىنىن ەسەلەپ، ەكسپورتتى 800 ملن. دوللارعا دەيىن ارتتىرۋعا دايىن.
"بۇرىنعىداي ءبىز كەڭ اۋقىمدى ءوزارا ءىس-قيمىلدىڭ رەتىن تاۋىپ، امەريكا قۇراما شتاتتارىمەن ءوزارا ءتيىمدى ىنتىماقتاستىقتى ودان ءارى تەرەڭدەتۋگە جانە نىعايتۋعا دايىنبىز", - دەدى ءاليحان سمايىلوۆ.ەستەرىڭىزگە سالا كەتەيىك، وسىدان ەكى كۇن بۇرىن تەگەران قالاسىندا قازاقستان پرەمەر-ءمينيسترى ءاليحان سمايىلوۆ يران يسلام رەسپۋبليكاسىنىڭ پرەزيدەنتى يبراحيم رايسيمەن كەزدەسكەن ەدى.
"ادىرنا" ۇلتتىق پورتالى
ۇقساس جاڭالىقتار
