الماتى وبلىسىندا پوليتسيا قىزمەتكەرى اسلان السەروۆتىڭ ولىمىنە قاتىستى كۇدىككە ىلىنگەن كامەلەتكە تولماعان جاسوسپىرىمدەرگە سوت بۇلتارتپاۋ شاراسىن تاڭدادى. كەگەن اۋداندىق سوتىنىڭ شەشىمىمەن ولار تەرگەۋ اياقتالعانعا دەيىن ۇيقاماقتا بولادى، دەپ حابارلايدى "ادىرنا".
بۇل تۋرالى كۇدىكتىلەردىڭ ادۆوكاتتارى گاۋحار سارىەۆا مەن دينارا شامشەكوۆا مالىمدەدى. تەرگەۋ سۋدياسى جاسوسپىرىمدەردى تەرگەۋ يزولياتورىنا قاماۋدان باس تارتىپ، ۇيقاماق شاراسىن قولدانعان. الداعى ۋاقىتتا ولارعا ەلەكتروندى بىلەزىك تاعىلىپ، تۇرعىلىقتى جەرىنە بەينەباقىلاۋ جۇيەسى ورناتىلادى.
سوت وتىرىسىندا قورعاۋشىلار ءىستىڭ بىرقاتار ءمان-جايىن ەسكەرۋدى سۇرادى. ولاردىڭ ايتۋىنشا، كۇدىكتى جاسوسپىرىمدەر ۇزاق ۋاقىت بويى وتباسىنداعى زورلىق-زومبىلىق پەن قاتىگەزدىككە كۋا بولعان، ءتىپتى وزدەرى دە سونداي جاعدايدىڭ قۇربانى بولۋى مۇمكىن. ادۆوكاتتار بۇل دەرەكتەردى تەرگەۋ بارىسىندا جان-جاقتى تەكسەرۋ قاجەت ەكەنىن ايتتى.
ەسكە سالايىق، 23 ماۋسىم كۇنى كەگەن اۋدانىنان 37 جاستاعى پوليتسيانىڭ اعا جەدەل ۋاكىلى اسلان السەروۆتىڭ ورتەنگەن دەنەسى تابىلعان بولاتىن. قىلمىسقا كۇدىكتى رەتىندە مارقۇمنىڭ جۇبايى، ونىڭ ۇلى جانە تاعى ءبىر ءجاسوسپىرىم ۇستالدى.
تەرگەۋ نۇسقاسىنا سايكەس، ادام ءولتىرۋ وقيعاسى الماتى قالاسىنداعى پاتەرلەردىڭ بىرىندە بولعان. كەيىن قىلمىستىڭ ءىزىن جاسىرۋ ماقساتىندا مارقۇمنىڭ دەنەسى كەگەن اۋدانىنا جەتكىزىلگەن. قازىر اتالعان دەرەك بويىنشا قر قىلمىستىق كودەكسىنىڭ 99-بابىنىڭ 2-بولىگىمەن سوتقا دەيىنگى تەرگەۋ جۇرگىزىلىپ جاتىر.
