ساياساتتانۋشى عالىم، قر مەملەكەتتىك كەڭەسشىسى ەرلان قارين قازاقستان رەسپۋبليكاسىندا وتكەن كەزەكتەن تىس سايلاۋدىڭ سيپاتى مەن ناتيجەسىنە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
- پرەزيدەنت سايلاۋى قوعامدى ءبىر ورتاعا شوعىرلاندىرۋدا جانە ەلدىڭ دامۋىندا اسا ەرەكشە ماڭىزعا يە. ماۋسىمدا وتكەن رەفەرەندۋمدا قازاقستاندىقتاردىڭ 77%-دان استامى كونستيتۋتسيالىق رەفورمانى ماقۇلدادى. بۇل ازاماتتاردىڭ قازىرگى بيلىكتىڭ اتقارىپ وتىرعان ءىس-ارەكەتتەرىنە قولداۋ تانىتقانىنىڭ كورىنىسى.
داۋىس بەرۋ قورىتىندىسى بويىنشا 80%-دان استام داۋىس جيناعان قاسىم-جومارت توقاەۆتىڭ ايقىن جەڭىسى قازىرگى بيلىكتىڭ ىسكە اسىرىپ جاتقان، سونداي-اق، بولاشاققا جوسپارلانىپ وتىرعان ءىس-قيمىلدارىنىڭ دۇرىس ەكەندىگىن كورسەتتى. بۇعان ەل ازاماتتارىنىڭ پرەزيدەنت ساياساتىن ماقۇلداۋى مەن قولداۋىنىڭ جوعارعى كورسەتكىشى دالەل.
ەگەر رەفەرەندۋم قوعامدىق كەلىسىمدى، ىمىرالاستىقتى جاڭا دەڭگەيگە كوتەرسە، پرەزيدەنت سايلاۋى ازاماتتاردى بىرىكتىرۋگە جاڭا مازمۇن مەن سيپات بەرەدى.
مەملەكەتىمىزدە كەزەكتەن تىس سايلاۋدىڭ ءوتۋى قازىرگى قوعام مەن بيلىك اراسىندا ورتاق ۇعىنىسۋ مەن ەل دامۋىنىڭ جارقىن كەلەشەگى بار ەكەندىگىن انىق ايقىندادى.
جالپى، ۇلكەن سايلاۋ تسيكلىنىڭ ءبىرىنشى كەزەڭى ءساتتى اياقتالدى دەپ ايتۋعا بولادى. كەلەسى كەزەڭ - پارلامەنتتىك جانە ماسليحاتتىق سايلاۋ.
ناتيجەسىندە، ءبىزدىڭ ەلىمىز قوعام مەن بيلىكتىڭ ىمىراسىن نىعايتىپ، مەملەكەتتىك ينستيتۋتتاردىڭ تۇراقتى جۇيەسىن قالىپتاستىرىپ، قازىرگى بۇلاعاي شاقتا الەمدەگى قاۋىپسىزدىك پەن تۇراقتىلىقتىڭ مەكەنىنە اينالارى ءسوزسىز، - دەپ جازدى ساياساتكەر.
"ادىرنا" ۇلتتىق پورتالى
