قازاقستان حالىق پارتياسى توراعاسى ەرمۇحامەت ەرتىسباەۆ قىزمەتىنەن كەتىپ، ونىڭ ورنىنا نۇرسۇلتان شوقانوۆ سايلاندى، دەپ حابارلايدى "ادىرنا" ۇلتتىق پورتالى.
پارتيانىڭ پارلامەنت سايلاۋى قارساڭىندا وتكەن سەزىندە بۇرىنعى توراعا ەرمۇحامەت ەرتىسباەۆ سوڭعى ءۇش جىلداعى قىزمەتىنىڭ قورىتىندىسىن شىعارىپ، باسشىلىقتىڭ اۋىسۋى ۇيىم دامۋىنىڭ تابيعي كەزەڭى ەكەنىن اتاپ ءوتتى.
پارتيانىڭ رەسمي مالىمەتىنە سايكەس، دەلەگاتتاردىڭ باسىم كوپشىلىگىنىڭ قولداۋىمەن نۇرسۇلتان شوقانوۆ قازاقستان حالىق پارتياسىنىڭ توراعاسى بولىپ سايلاندى. سونىمەن قاتار، سەزد بارىسىندا پارتيا جارعىسىنىڭ جاڭارتىلعان نۇسقاسى مەن جاڭا كورپوراتيۆتىك ايدەنتيكاسى بەكىتىلدى.
1986 جىلى الماتى قالاسىندا دۇنيەگە كەلگەن نۇرسۇلتان شوقانوۆ KIMEP University وقۋ ورنىندا «قارجى» ماماندىعى بويىنشا ءبىلىم العان. كەيىن IMD Business School بيزنەس مەكتەبىندە Executive MBA دارەجەسىن تامامداعان. ەڭبەك جولىن Ernst & Young حالىقارالىق اۋديتورلىق كومپانياسىندا باستاعان. كەيىن مۇناي سەرۆيستىك سالادا باسشىلىق قىزمەتتەر اتقارىپ، كورپوراتيۆتىك قارجى، اكىمشىلىك جانە داعدارىسقا قارسى باسقارۋ باعىتتارىنا جەتەكشىلىك ەتكەن. 2009 جىلدان بەرى كاسىپكەرلىكپەن اينالىسىپ كەلەدى. قازىرگى تاڭدا قوعامدىق تاماقتانۋ، ازىق-تۇلىك جەتكىزۋ، بولشەك ساۋدا، اقپاراتتىق تەحنولوگيالار، ءوندىرىس جانە ديستريبۋتسيا سالالارىندا جۇمىس ىستەيتىن OMIR Group كومپانيالار توبىنىڭ ديرەكتورلار كەڭەسىن باسقارادى. 2021 جىلدان باستاپ قازاقستان حالىق پارتياسىنان الماتى قالاسى ءماسليحاتىنىڭ VII جانە VIII شاقىرىلىم دەپۋتاتى بولدى. وندا قۇرىلىس، ساۋلەت، قالالىق ينفراقۇرىلىم، ۋربانيستيكا جانە جەر قاتىناستارى ماسەلەلەرى جونىندەگى كوميسسيالاردىڭ جۇمىسىنا جەتەكشىلىك ەتتى. 2022 جىلدان بەرى پارتيانىڭ الماتى قالالىق جانە الماتى وبلىستىق فيليالدارىن باسقارعان. ال 2023 جىلى اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى بولىپ سايلاندى.
