قىرعىزستان پارلامەنتىندە دەپۋتاتتاردىڭ قاتارىنان ەكى مەرزىمنەن ارتىق سايلانۋىنا شەكتەۋ قويۋ تۋرالى ۇسىنىس ايتىلدى، دەپ حابارلايدى “ادىرنا” ۇلتتىق پورتالى 24.kg-عا سىلتەپ.
بۇل باستامانى جوعارى كەڭەس دەپۋتاتى مەدەر اليەۆ كوتەرىپ، حالىق اراسىندا پارلامەنتتىڭ قۇرامى ۇزاق ۋاقىت بويى وزگەرمەيتىنى تۋرالى سىن كۇشەيگەنىن اتاپ ءوتتى.
«ءبىز شەكتەۋ ەنگىزسەك، قالاي قارايسىزدار؟ مىسالى، دەپۋتات بولىپ قاتارىنان ەكى مەرزىمگە عانا سايلانۋعا رۇقسات ەتىلسىن»، – دەدى ول.
الايدا، زاڭ جوباسىنىڭ اۆتورلارىنىڭ ءبىرى ۇلان ءپرىموۆ بۇل ۇسىنىستى كانديداتتاردىڭ قۇقىعىن شەكتەۋ دەپ باعالادى. ول دەپۋتاتتاردى سايلاۋ ماسەلەسى حالىقتىڭ تاڭداۋى ەكەنىن ايتىپ، جازباشا ۇسىنىس بەرىلگەن جاعدايدا ونى تالقىلاۋعا دايىن ەكەنىن جەتكىزدى.
مەدەر اليەۆتىڭ پىكىرىنشە، سايلاۋ جۇيەسىن رەفورمالاعانىمەن، ازاماتتاردىڭ كوزقاراسى وزگەرمەسە، نەگىزگى پروبلەمالار شەشىلمەيدى. قازىرگى ۋاقىتتا بۇل ۇسىنىس پارلامەنتتە رەسمي تۇردە تالقىلاناتىن ماسەلەلەردىڭ قاتارىندا جوق.
