Qazaqstan Halyq partiiasy töraǧasy Ermūhamet Ertısbaev qyzmetınen ketıp, onyŋ ornyna Nūrsūltan Şoqanov sailandy, dep habarlaidy "Adyrna" ūlttyq portaly.
Partiianyŋ Parlament sailauy qarsaŋynda ötken sezınde būrynǧy töraǧa Ermūhamet Ertısbaev soŋǧy üş jyldaǧy qyzmetınıŋ qorytyndysyn şyǧaryp, basşylyqtyŋ auysuy ūiym damuynyŋ tabiǧi kezeŋı ekenın atap öttı.
Partiianyŋ resmi mälımetıne säikes, delegattardyŋ basym köpşılıgınıŋ qoldauymen Nūrsūltan Şoqanov Qazaqstan Halyq partiiasynyŋ töraǧasy bolyp sailandy. Sonymen qatar, sezd barysynda partiia Jarǧysynyŋ jaŋartylǧan nūsqasy men jaŋa korporativtık aidentikasy bekıtıldı.
1986 jyly Almaty qalasynda düniege kelgen Nūrsūltan Şoqanov KIMEP University oqu ornynda «Qarjy» mamandyǧy boiynşa bılım alǧan. Keiın IMD Business School biznes mektebınde Executive MBA därejesın tämamdaǧan. Eŋbek jolyn Ernst & Young halyqaralyq auditorlyq kompaniiasynda bastaǧan. Keiın mūnai servistık salada basşylyq qyzmetter atqaryp, korporativtık qarjy, äkımşılık jäne daǧdarysqa qarsy basqaru baǧyttaryna jetekşılık etken. 2009 jyldan berı käsıpkerlıkpen ainalysyp keledı. Qazırgı taŋda qoǧamdyq tamaqtanu, azyq-tülık jetkızu, bölşek sauda, aqparattyq tehnologiialar, öndırıs jäne distribusiia salalarynda jūmys ısteitın OMIR Group kompaniialar tobynyŋ direktorlar keŋesın basqarady. 2021 jyldan bastap Qazaqstan Halyq partiiasynan Almaty qalasy mäslihatynyŋ VII jäne VIII şaqyrylym deputaty boldy. Onda qūrylys, säulet, qalalyq infraqūrylym, urbanistika jäne jer qatynastary mäselelerı jönındegı komissiialardyŋ jūmysyna jetekşılık ettı. 2022 jyldan berı partiianyŋ Almaty qalalyq jäne Almaty oblystyq filialdaryn basqarǧan. Al 2023 jyly Atameken» Ūlttyq käsıpkerler palatasy basqarma töraǧasynyŋ orynbasary bolyp sailandy.
