ماجىلىسمەن ەرمۇرات ءباپي قر باس پروكۋرورى بەرىك اسىلوۆقا جولداعان دەپۋتاتتىق ساۋالىندا رەسەيدى سىناپ سوتتالعان بلوگەرلەردى بوستاندىققا شىعارۋدى تالاپ ەتتى, دەپ حابارلايدى “ادىرنا” ۇلتتىق پوتالى.
"پەتروپاۆل قالاسىندا جۋىردا بولعان سەپاراتيزم سيپاتىنداعى وعاش وقيعا قازاقستانداعى ۇلتتىق-جىكشىلدىك پيعىلدىڭ وتە قاۋىپتى تاقىرىپ ەكەنىن تاعى ءبىر رەت كورسەتتى. بۇل - "جاڭا قازاقستان" يدەياسىنا قارسى باعىتتالعان جانە وعان تىكەلەي تونگەن قاتەردىڭ بىرەگەي بەلگىسى دەپ باعالاۋ كەرەك", – دەدى دەپۋتات.
سونداي-اق، ول ەل ىشىنە ىرىتكى سالۋ قوعامنىڭ قاتتى الاڭداۋشىلىعىن تۋعىزىپ وتىرعانىن ايتتى.
ء"يا، ەل كونستيتۋتسياسى مەن ءتيىستى مەملەكەتتىك زاڭدار كەز كەلگەن سەپاراتيزمگە قارسى تۇرا الادى. بىراق حالىقتىق مۇددەنىڭ قاسيەتتىن قورعايتىن "ۇلتتىق نامىس" دەپ اتالاتىن تاعى ءبىر قۇدىرەتتى كۇش بار. دەگەنمەن، ءبىزدىڭ ەلدىڭ نامىسىن قورعاعان ۇلتجاندى ازاماتتار مارعۇلان بورانباەۆ پەن دانات نامازباەۆ "ۇلتارالىق ارازدىقتى تۋدىردى" دەگەن جەلەۋمەن ارقايسىسى 5 جىلعا سوتتالىپ كەتتى. انىعىندا، بۇل ازاماتتار "ۇلتارالىق ارازدىقتان" بۇرىن، قازاق حالقىنىڭ نامىسىن "جىرتىپ", ۇلتتىق مۇددەنى قورعاپ، الەۋمەتتىك جەلىلەردەگى سەپاراتيستىك كوزقاراستارعا قارسى شىققانى ءۇشىن سوتتى بولدى. بۇل جىگىتتەرگە ورەسكەل قيانات جاسالدى", – دەدى ءباپي.
دەپۋتاتتىڭ پىكىرىنشە، كورشىلەس ەلدەردىڭ ازاماتتارى اۋزىنا كەلگەنىن ايتىپ جانە جازىپ جاتقان الاۋىز پىكىرلەرمەن سالىستىرعاندا، م.بورانباەۆ پەن د.نامازباەۆتىڭ الەمجەلىدەگى ارەكەتى بالانىڭ ويىنى بولىپ قالدى. ولارعا جاسالعان قيانات پەن ادىلەتسىزدىك وسى سالىستىرۋدان تۋىندايدى.
ء"بىر ەل نەگە ءوزىنىڭ سىڭارەزۋ ساياساتشىلارىنا تىيىم سالمايدى، ءبىزدىڭ ەل نەگە ءوزىنىڭ ەلدىك مۇددەسى مەن حالىقتىق نامىسىن قورعاعان ازاماتتارىن سوتتايدى؟ ولار نەگە "ورىس پاتريوتتارى" بولىپ سانالادى، ال ءوز حالقىنىڭ نامىسىن جىرتقان مارعۇلان مەن دانات نەگە قازاق حالقىنىڭ پاتريوتتارى بولا المايدى؟ كورشى ەلدىڭ "ۇرانشىلارى" قىلمىستىق سوتقا تارتىلماق تۇگىلى، ءوز بيلىگى مەن ءتيىستى ورگاندارى تاراپىنان اكىمشىلىك تۇرعىدا ەسكەرتۋ دە العان جوق. ال ەل نامىسىنا اراشا تۇسكەن ەكى جىگىت نەگە سوتتى بولادى؟ ەندەشە، بۇعان دەيىن قازاقستاندا بولىپ كەلگەن سەپاراتيزم سيندرومىن جانە پەتروپاۆل قالاسىنداعى جۋىقتا بولعان جىكشىلدەنۋدىڭ جيىركەنىشتى جاعداياتىن ەسكەرە وتىرىپ، مارعۇلان بورانباەۆ پەن دانات نامازباەۆقا قاتىستى ۇكىمدى قايتادان قارايتىن ۋاقىت تا، ساياسي سەبەپ تە، ۇلتتىق قاۋىپسىزدىك مۇقتاجدىعى دا تۋدى دەپ ەسەپتەيمىن", – دەگەن دەپۋتات باس پروكۋرورعا قۇزىرەتىن پايدالانا وتىرىپ، جاڭادان پايدا بولعان جاعداياتتارعا سايكەس، قازاقستاننىڭ جوعارعى سوتىنان مارعۇلان بورانباەۆ پەن دانات نامازباەۆقا قاتىستى سوت ۇكىمىن قايتا قاراۋعا، ولاردى تۇرمەدەن بوساتۋعا پارمەن بەرۋدى سۇرادى.
ەسكە سالسق، بىلتىر بلوگەرلەر مارعۇلان بورانباي مەن دانات نامازباي رەسەي تۋرالى جازبالارى ءۇشىن 5 جىلعا سوتتالدى. ولار رەسەيلىك ساياساتكەرلەردىڭ قازاقستان تۋرالى پىكىرلەرىنە قارسى ءوز ويلارىن اشىق ايتقان. سونىمەن قاتار رەسەيمەن ينتەگراتسيالىق بايلانىستىڭ دامۋىنا قارسىلىقتارىن بىلدىرگەن. ءارى رەسەي اسكەرىنىڭ ۋكرايناداعى ءىس-ارەكەتىن دە سىنعا العان.
