الەۋمەتتىك جەلىدە ءماجىلىس دەپۋتاتى ارداق نازاروۆتىڭ جۋرناليستەردىڭ سۇراعىنا جاۋاپ بەرمەگەنى قىزۋ تالقىلانىپ جاتىر. كەشە اdyrna.kz ۇلتتىق پورتالىنىڭ ءتىلشىسى سۋ جاڭا دەپۋتاتتىڭ ءتارتىبىن ءماجىلىس توراعاسى ەرلان قوشانوۆقا جەتىزگەن بولاتىن. سپيكەردىڭ «ارداق نازاروۆقا ەسكەرتۋ بەرىلەدى» دەگەنىنەن كەيىن دەپۋتات تاۋبەسىنە تۇسكەن سەكىلدى. ناقتىراق ايتساق، «ينتەرنەتتى اقتارىپ باس اۋىرتپايتىن» ازامات facebook الەۋمەتتىك جەلىسىندە جۋرناليستەرگە العىس ءبىلدىرىپتى.
«اللاعا شۇكىر، بۇگىن حالقىمىزدىڭ الدىندا انت بەرىپ جاڭا جاۋاپكەرشىلىكتى ءوز موينىمىزعا جۇكتەدىك. ماعان شىن نيەتپەن تىلەكشى بولىپ وتىرعان اعايىنعا العىسىمدى بىلدىرەمىن ء“بىراز سۇراقتارعا جاۋاپ بەرىلمەدى”-دەپ ۋايىمداپ وتىرعاندارىڭىزدى بىلەمىن. ءبىز سپورتشىمىز عوي، رينگكە قىزدىرىنباي كىرمەيمىز. ءدال سول سياقتى ساياسي رينگتە دە قىزدىرىنىپ، جان-جاقتى باعامداپ، ىشكى كۋحنياسىن كورىپ بارىپ جاۋاپ بەرگەنىمىز دۇرىس بولادى. جاقسى-جاماندى تارازىلايتىن، باعا بەرەتىن ۋاقىت ءالى الدا. ايتپاقشى جۋرناليستەر قاۋىمىنا العىسىمدى بىلدىرەمىن، ءبىزدى ساياسي مايدانعا كىرمەستەن بۇرىن شىڭداپ جاتىرسىزدار»، - دەپ جازدى دەپۋتات.
ارداق نازاروۆتىڭ جازباسى ەرلان قوشانوۆقا قويىلعان سۇراقتار كەيىن جاريالانىپ وتىر. دەمەك ءماجىلىس توراعاسى دەپۋتاتپەن سويلەسكەن بولۋى مۇمكىن. ال اdyrna.kz ۇلتتىق پورتالىنىڭ ءتىلشىسى ەرلان جاقانۇلىنا قانداي سۇراق قويىپ ەدى؟
– ەرلان جاقانۇلى دەپۋتاتتار جۇمىسىنا كىرىسپەي جاتىپ «ونەر» شىعارىپ جاتىر. ناقتىراق ايتسام، كەشە ارداق نازاروۆ ورتالىق سايلاۋ كوميسسياسىنىڭ الدىندا جانە بۇگىن ماجىلىستە جۋرناليستەردىڭ سۇراعىنا ادەيى جاۋاپ بەرمەي كەتتى. ءماجىلىستىڭ جانىنداعى ادەپ كوميسسياسىندا جۋرناليستەردىڭ سۇراعىنا جاۋاپ بەرمەيتىن دەپۋتاتتاردىڭ ماسەلەسى قارالا ما؟
– ءبىز ءالى ادەپ كەڭەسىن قۇرعان جوقپىز. بىراق ءبىز مەيلىنشە اشىق بولۋعا تىرسامىز. بۇگىن دەپۋتاتتاردىڭ ءبىرىنشى جاڭا وتىرىسى بولدى عوي. ارينە، مەن پارلامەنت سپيكەرى رەتىندە جانە وزگە دە باسشىلار دەپۋتاتتارمەن جۇمىس جۇرگىزىپ، جۋرناليستەرگە بايلانىستى تالاپتى جەتكىزەمىز. بۇعان دەيىنگى جەتىنشى شاقىرىلىمدا ونداي وقيعالار بولدى دەپ مەن ايتا المايمىن. سولاي عوي!؟ سوندىقتان، ءبىز دە ونى قايتالاماۋعا تىرىسامىز. ارينە، جۋرناليستەرمەن كەزدەسۋ، سىزدەرگە سۇحبات بەرۋ – ءبىرىنشى كەزەكتە ءبىزدىڭ مۇددەمىز. سەبەبى سىزدەر ارقىلى حالىققا جاساپ جاتقان جۇمىسىمىزدى جەتكىزۋ – بىزگە قاجەت.
– جەكە ءوزىڭىزدىڭ تاراپىڭىزدان ارداق نازاروۆقا ەسكەرتۋ بولا ما؟
– ارداق نازاروۆ ءبىزدىڭ رەگلامەنتتى بۇزاتىن بولسا، ارينە، ەسكەرتۋ بەرىلەدى.
– جۋرناليستەردىڭ سۇراعىنا ادەيى جاۋاپ بەرمەيتىن بولسا. زاڭدا قانداي تەتىك كورسەتىلگەن؟ مىسالى دەپۋتاتتىق مانداتتان ايىرۋ ماسەلەسى قاراستىرىلا ما؟
– جۋرناليستەردىڭ سۇراعىنا جاۋاپ بەرمەگەن ەكەن دەپ، دەپۋتاتتىق مانداتىنان ايىرۋ دەگەن زاڭدا قاراستىرىلماعان. دەپۋتات ءوزى قۇقىلى – جاۋاپ بەرە مە، جوق پا؟ بىراق جاۋاپ بەرۋى قاجەت.
– ەگەر ءجۋرناليستىڭ سۇراعىنا جاۋاپ بەرمەسە نەگە دەپۋتات بولدى؟
– مەنىڭ ويىمشا، بۇل شەشىلمەيتىن ماسەلە ەمەس.
P.S. جالپى ارداق نازاروۆقا قاتىستى سۇراق كوپ. مىسالى ونىڭ بەكبولات تىلەۋحان مەن مۇحامەدجان تازابەكوۆكە قانداي قاتىسى بار؟ ەگەر ارداق نازاروۆ جۋرناليستەردىڭ سۇراعىنا اشىق جاۋاپ بەرسە، وندا ول سىننان قورىتىندى شىعارعان بولىپ سانالادى. ال تاعى دا ەسكى اۋەنىنە باسسا، وندا مۇنداي ادامنىڭ دەپۋتات بولعانىنان حالىققا قانداي پايدا بار؟
سەرىك جولداسباي،
"ادىرنا" ۇلتتىق پورتالى
