Ūlytau oblysynyŋ Jaŋaarqa audanynda qazaq halqynyŋ bai mūrasy men ūlttyq qūndylyqtaryn ūlyqtaityn dästürlı «Kökmaisa – dalanyŋ tırı tarihy» etnofestivalı bastaldy. Öŋırde bır mezette 35 kiız üi tıgılıp, 15 myŋǧa juyq qonaq jinaldy.
Auqymdy mädeni ıs-şaraǧa Ūlytau oblysynyŋ äkımı Dastan Ryspekov qatysyp, festival alaŋyndaǧy negızgı körme jäne etnoaimaqtardy aralady.
Festivaldıŋ alǧaşqy baǧdarlamasy taŋǧy saǧat 09:30-da kreativtı aimaqpen tanysudan bastaldy. Odan keiın «Kökmaisa – dalanyŋ tırı tarihy» ūlttyq taǧamdar men salt-dästürler festivalınıŋ saltanatty aşylu räsımı ötıp, öŋır basşysy jinalǧan jūrtşylyqty merekemen qūttyqtady.
– «Kökmaisa» – oblysymyzdyŋ brendıne ainalǧan erekşe festival. Biyl ol on bırınşı ret ūiymdastyrylyp otyr. Osy uaqytqa deiın būl igı dästür Ūlytau audanynda ötkızılıp kelse, biyl alǧaş ret Jaŋaarqa jerınde jalǧasyn tapty. Mūnda alys-jaqyn şetelderden qonaqtar qyzyǧuşylyq tanytyp arnaiy kelıp otyr. Būl bız üşın ülken märtebe. , – dedı Ūlytau oblysynyŋ äkımı Dastan Ryspekov.
Festivaldıŋ eŋ äserlı sätterınıŋ bırı – bır mezette 500 bienıŋ sauyluy boldy. Būl körınıs ūlttyq dästürdıŋ ömırşeŋdıgın aişyqtap, jinalǧan jūrtşylyqtyŋ erekşe yqylasyna bölendı.
Sonymen qatar qazaq halqynyŋ köne «Qymyzmūryndyq» dästürı sahnalanyp, auyl aqsaqaldary aq batasyn berdı. Qonaqtar men körermenderge jaŋa sauylǧan qymyz ūsynylyp, ūlttyq oiyndar men dästürlı öner körsetılımderı ūiymdastyryldy.
Būdan keiın oblys äkımı elımızdıŋ är öŋırınen kelgen etnoauyldardy aralap, kiız üiler körmesımen tanysty. Ūlttyq taǧamdardan däm tatyp, salt-dästür körınısterın tamaşalady jäne qolöner şeberlerınıŋ tuyndylaryn körıp, olardyŋ eŋbegıne joǧary baǧa berdı.
Festival aiasynda ūlttyq sport türlerınen de tartysty jarystar öttı. Qonaqtar kökpar, audaryspaq, qazaq küresı, dästürlı sadaq atu, asyq atu, jılık syndyru, qoşqar köteru jäne arqan tartys sekıldı ūlttyq oiyndardyŋ qyzyǧyna kuä boldy.
Künnıŋ ekınşı jartysynda ūlttyq sport jeŋımpazdary men qūraq körpe tıgudıŋ üzdık şeberlerın marapattau räsımı ötedı.
Merekelık şara keşkı gala-konsertpen qorytyndylanady. Sahnada qazaqstandyq estrada jūldyzdary – Ūşqyn Jamalbek, Özgerıs Jerıkbai jäne JOSHY QAZAQ NATIONAL GROUP öner körsetedı.
«Kökmaisa – dalanyŋ tırı tarihy» etnofestivalı – halqymyzdyŋ salt-dästürın, ūlttyq taǧamdaryn, qolönerın jäne etnomädeni mūrasyn keŋınen därıptep, ūlttyq bıregeilıktı nyǧaitatyn taǧylymy mol mädeni joba. Būl festival ūlt ruhaniiatyn ūlyqtap qana qoimai, öŋırdıŋ turistık äleuetı men mädeni kelbetın aişyqtaityn maŋyzdy şara retınde öz märtebesın jyl saiyn arttyryp keledı.
