ۇلىتاۋ وبلىسىندا بۇقارالىق اقپارات قۇرالدارى قىزمەتكەرلەرى كۇنىنە ارنالعان سالتاناتتى ءىس-شارا ءوتىپ، اقپارات سالاسىنىڭ ۇزدىك وكىلدەرى ماراپاتتالدى.
ءداستۇرلى مەرەكەلىك جيىندا ۇلىتاۋ وبلىسى اكىمىنىڭ ارنايى «ۇلار» سىيلىعى تابىستالىپ، ءوڭىر جۋرناليستەرىنىڭ ەڭبەگى جوعارى باعالاندى. سونىمەن قاتار، مەملەكەت باسشىسىنىڭ تاپسىرماسىنا سايكەس، وبلىستىڭ ەكى جۋرناليسىنە ەكى بولمەلى پاتەردىڭ كىلتتەرى تاپسىرىلدى. ۇلىتاۋ وبلىسىنىڭ اكىمى داستان ادايۇلى رىسپەكوۆ «حابار» تەلەارناسىنىڭ وبلىستاعى مەنشىكتى ءتىلشىسى ەلدوس كاكەنوۆ پەن «ايماق اقشامى» گازەتىنىڭ اعا ءتىلشىسى مەيرامكۇل الپىسباەۆاعا پاتەر كىلتتەرىن سالتاناتتى جاعدايدا تابىستادى.
سالتاناتتى جيىنعا قاتىسقان ۇلىتاۋ وبلىسىنىڭ اكىمى جۋرناليستەردى كاسىبي مەرەكەلەرىمەن قۇتتىقتاپ، قوعام مەن مەملەكەت اراسىنداعى التىن كوپىرگە اينالعان اقپارات سالاسى وكىلدەرىنىڭ ءوڭىردىڭ دامۋى مەن ەل بىرلىگىن نىعايتۋداعى ەرەكشە ەڭبەگىن اتاپ ءوتتى. ءوڭىر باسشىسى بۇقارالىق اقپارات قۇرالدارى قىزمەتكەرلەرىنە شىنايى العىسىن ءبىلدىرىپ، جاۋاپتى قىزمەتتەرىنە تابىس تىلەدى.
مەرەكە اياسىندا سالا ارداگەرلەرى مەن ۇزدىك ماماندارعا مەملەكەتتىك جانە ۆەدومستۆولىق ناگرادالار تابىستالدى. اتاپ ايتقاندا، «ەرەن ەڭبەگى ءۇشىن» جانە «ەڭبەك ارداگەرى» مەدالدارى، «اقپارات سالاسىنىڭ ۇزدىگى»، «قازاقستاننىڭ قۇرمەتتى ءجۋرناليسى» توسبەلگىلەرى، قازاقستان رەسپۋبليكاسى مادەنيەت جانە اقپارات ءمينيسترىنىڭ قۇرمەت گراموتالارى مەن العىسحاتتارى تاپسىرىلدى. سونداي-اق بىرقاتار جۋرناليستەر مەن مەديا سالاسىنىڭ قىزمەتكەرلەرى ۇلىتاۋ وبلىسىنىڭ قۇرمەت گراموتاسىمەن جانە وبلىس اكىمىنىڭ العىسحاتىمەن ماراپاتتالدى.
كەشتىڭ باستى وقيعالارىنىڭ ءبىرى – ۇلىتاۋ وبلىسى اكىمىنىڭ «ۇلار» سىيلىعىنىڭ جەڭىمپازدارىن ماراپاتتاۋ ءراسىمى بولدى. بيىل سىيلىقتىڭ 13 نوميناتسياسى بويىنشا ۇزدىك اتانعان جۋرناليستەرگە 500 مىڭ تەڭگەدەن 1 ميلليون تەڭگەگە دەيىنگى اقشالاي سىياقىلار تابىستالدى.
مەرەكەلىك ءىس-شارا ءوڭىر جۋرناليستەرىنىڭ قوعامداعى ماڭىزدى ميسسياسىنا قۇرمەت كورسەتىپ، ولاردىڭ كاسىبي ەڭبەگىن لايىقتى باعالاۋدىڭ جارقىن كورىنىسىنە اينالدى.
