سەنبى كۇنى، 22 قاراشادا Instagram الەۋمەتتىك جەلىسىندە بىرقاتار تانىمال قازاقستاندىق جۋرناليستەر مەن بەلسەندىلەردىڭ اككاۋنتتارىندا كۇتپەگەن وزگەرىستەر ورىن الدى. جۋرناليست ۆاديم بورەيكو مەن بەلسەندى سانجار بوقاەۆتىڭ پاراقشالارىنداعى بارلىق جاريالانىمدار تولىقتاي ءوشىرىلىپ، ال جۋرناليست اسحات نيازوۆتىڭ اككاۋنتى مۇلدەم قولجەتىمسىز بولىپ قالعان. بۇل تۋرالى قۇقىق قورعاۋشى باقىتجان تورەعوجينا ايتتى، دەپ حابارلايدى "ادىرنا".
جۋرناليست ۆاديم بورەيكو Facebook جەلىسىندە ءوزىنىڭ Instagram-اككاۋنتىنداعى بارلىق كونتەنتتىڭ جويىلعانىن جازدى. ايتۋىنشا، ول پاراقشاعا كىرە الادى، بىراق وندا ەشقانداي جازبا قالماعان.
بورەيكو سوڭعى ۋاقىتتا پاراقشاسى بەلسەندى دامىعانىن اتاپ ءوتتى: ونىڭ 168 مىڭ جازىلۋشىسى بولىپ، وتكەن ايدا ۆيدەولارى 15 ميلليوننان استام قارالىم جيناعان. جۋرناليست بۇل جاعدايدىڭ بىلتىر TikTok-تاعى اككاۋنتىنىڭ ءدال وسىلاي وشىرىلۋىمەن ۇقساس ەكەنىن ەسكە سالدى.
سونداي-اق ول Instagram مەن Facebook سوڭعى ايلاردا ونىڭ ەسكى جازبالارىن «تۇسىنىكسىز ەرەجەبۇزۋشىلىقتار» سەبەپتەرىمەن جۇيەلى تۇردە الىپ تاستاعانىن ايتتى.
تانىمال جۋرناليست، «وبوجايۋ» ارناسىنىڭ اۆتورى اسحات نيازوۆتىڭ Instagram-اككاۋنتى دا سەنبى كۇنى قولجەتىمسىز بولىپ قالدى. بۇعان دەيىن نيازوۆ 2023 جىلدىڭ سوڭىندا جانە 2024 جىلدىڭ باسىندا بارلىق الەۋمەتتىك جەلىلەرىنىڭ بۇعاتتالۋىمەن بەتپە-بەت كەلگەن ەدى. ول كەزدە شەكتەۋلەر ونىڭ ارىپتەستەرى مەن ءتىپتى وتباسى مۇشەلەرىنىڭ پاراقشالارىنا دا اسەر ەتكەن.
سىبايلاس جەمقورلىق ماسەلەلەرىن كوتەرىپ جۇرگەن بەلسەندى ءارى بلوگەر سانجار بوقاەۆتىڭ Instagram-پاراقشاسىنداعى بارلىق جاريالانىمدار دا تولىق وشىرىلگەن. بەلسەندىنىڭ پاراقشاسى بۇرىن كوررۋپتسيالىق سحەمالاردى اشكەرەلەۋگە باعىتتالعان ۆيدەولارىمەن تانىلعان ەدى.
ازىرگە اتالعان وقيعالارعا قاتىستى Instagram-نىڭ ءوزى دە، جەرگىلىكتى ورگاندار دا رەسمي تۇسىنىكتەمە بەرگەن جوق. قوعام بەلسەندىلەرى بۇل جاعدايدى الەۋمەتتىك جەلىلەردەگى تسەنزۋرا كۇشەيۋىنىڭ بەلگىسى رەتىندە باعالاپ وتىر.
