يسلام رەۆوليۋتسياسىنىڭ ساقشىلار كورپۋسى يزرايلگە قارسى «شىنايى ۋادە-3» دەپ اتالاتىن اسكەري وپەراتسياسىن باستادى، دەپ حابارلايدى “ادىرنا” ۇلتتىق پورتالى ريا-عا سىلتەپ.
يران تاراپى بۇل ارەكەتتى ءيزرايلدىڭ اگرەسسياسىنا جاۋاپ رەتىندە جاساعانىن مالىمدەدى.
«يران حالقىنىڭ قورعانىس كۇشى رەتىندە، اللانىڭ قۇدىرەتىنە جانە جوعارعى باس قولباسشىنىڭ دانا باسشىلىعىنا سۇيەنىپ، «شىنايى ۋادە-3» وپەراتسياسى باستالدى»، – دەلىنگەن حابارلامادا.وپەراتسيا بارىسىندا يران يزرايلگە قاراي 300-گە جۋىق بالليستيكالىق زىمىران اتقىلاعان. ولاردىڭ توعىزى يزرايل اۋماعىنا قۇلاعان. يراندىق زىمىرانداردىڭ ەكەۋى يزرايل قورعانىس مينيسترلىگىنىڭ عيماراتىنا تىكەلەي تيگەن. سونىمەن قاتار، يران ارمياسى ءيزرايلدىڭ ەكى F-16 ۇشاعى مەن بىرنەشە ۇشقىشسىز اپپاراتىن جويعانىن راستادى. Tasnim اگەنتتىگىنىڭ حابارلاۋىنشا، يران اسكەرى ءيزرايلدىڭ قۇلاعان ۇشاعىنىڭ ايەل ۇشقىشىن تۇتقىنعا العان. يراننىڭ شابۋىلى سالدارىنان كەمىندە 40 ادام زارداپ شەككەن. ونىڭ ىشىندە ەكەۋى اۋىر جارالانعان. جەلىدە تەل-اۆيۆتەگى عيماراتقا زىمىران تيگەن ءساتتىڭ ۆيدەوسى تارادى. يزرايل پرەمەر-ءمينيسترى بينيامين نەتانياحۋ يران حالقىنا ۇندەۋ جاساپ، ولاردى رەسمي تەگەران بيلىگىنە قارسى شىعۋعا شاقىردى.
«ءدال قازىر – ارەكەت ەتەتىن ۋاقىت»، – دەدى ول.يزرايل مينيسترلەر كابينەتى يرانعا قارسى جاۋاپ شارالارىن قاراستىرىپ جاتىر. ال بۇۇ جانىنداعى رەسەيدىڭ تۇراقتى وكىلى ۆاسيلي نەبەنزيا ءيزرايلدىڭ شابۋىلىن قاتاڭ ايىپتاپ، ونى «يادرولىق اپاتقا يتەرمەلەيتىن ارەكەت» دەپ اتادى. تۇرىك زاڭگەرى سەردار توقدەمير جاعدايدى ءۇشىنشى دۇنيەجۇزىلىك سوعىستىڭ باستالۋىمەن تەڭەستىردى. «ءيزرايلدىڭ بۇل وپەراتسياسى – ايماقتى تولىق قامتيتىن، جۇيەلى ءارى جوسپارلى شابۋىل»، – دەدى ول. يراننىڭ بۇۇ-داعى تۇراقتى وكىلى امير سايد يراۆاني ءيزرايلدىڭ ارەكەتىن «سوعىس جاريالاۋمەن تەڭ، حالىقارالىق قۇقىقتى ورەسكەل بۇزۋ» دەپ باعالادى. ونىڭ ايتۋىنشا، شابۋىل سالدارىنان يراندا 78 ادام قازا تاۋىپ، 320-دان استام ادام جاراقات العان. وقيعالارعا بايلانىستى قازاقستان تاياۋ شىعىستاعى اۋە كەڭىستىگىنەن بارلىق رەيستەردى شەكتەدى. ازاماتتىق اۆياتسيا كوميتەتى قازاقستاندىق اۋە كومپانيالارىنا يران، يزرايل، سيريا، يراك، ليۆان جانە يوردانيا ارقىلى ۇشۋعا تىيىم سالدى.
«بۇل شەشىم ايماقتاعى جاعدايدىڭ كۇرت ناشارلاۋىنا بايلانىستى قابىلداندى. ءتىپتى اسكەري ايماقتىڭ ماڭىنا جاقىنداۋعا دا بولمايدى. تىيىم دەرەۋ كۇشىنە ەنەدى»، – دەلىنگەن حابارلامادا.
ۇقساس جاڭالىقتار
