“وتەماقى الامىن” دەگەن ايەل الاياققا الدانىپ، ءۇيىن ورتەگەن

چەليابى قالاسىندا الاياقتاردىڭ ىقپالىمەن ايەل ادام ءوز پاتەرىن ورتەدى، دەپ حابارلايدى "ادىرنا" ۇلتتىق پورتالى.

بۇل تۋرالى جەرگىلىكتى اقپارات قۇرالدارى حابارلادى.

الەۋمەتتىك جەلىدە تاراعان بەينەجازبادا بەلگىسىز ەر ادامنىڭ ايەلگە نۇسقاۋ بەرىپ، ونى پاتەرىندەگى توسەككە قاعاز قويىپ، وت جاعۋعا يتەرمەلەگەنى بايقالادى. كادرلاردا ەر ادام «بارلىعى تىركەلىپ جاتىر»، «بەس مينۋت كۇتۋ كەرەك» دەگەن مازمۇندا سويلەپ، ارەكەتتى جالعاستىرۋعا كوندىرگەنى ەستىلەدى.

وت تۇتانعاننان كەيىن جالىن تەز تارالىپ، بولمەنى شارپىعان. الايدا الاياقتىڭ قىسىمىنا قاراماستان، ايەل كەيىن ەسىن جيىپ، پاتەردەن شىعىپ ۇلگەرگەن. ونىمەن بىرگە كورشىلەرى دە قاۋىپسىز جەرگە ەۆاكۋاتسيالانعان. زارداپ شەككەندەر تۋرالى اقپارات جوق.

كەيىنىرەك قۇقىق قورعاۋ ورگاندارى ايەلدىڭ الاياقتارعا الدانىپ، ولارعا 40 مىڭ رۋبل اۋدارعانىن جانە پاتەردى ورتەگەن جاعدايدا ساقتاندىرۋ تولەمى تولەنەدى دەگەن ۋادەمەن ارەكەت ەتكەنىن حابارلادى.

پوليتسيا اتالعان فاكتى بويىنشا الاياقتىق بابىمەن قىلمىستىق ءىس قوزعادى.

تەرگەۋ امالدارى جۇرگىزىلۋدە. ماماندار ازاماتتاردى بەيتانىس ادامداردىڭ نۇسقاۋىمەن ەشقانداي ارەكەت جاساماۋعا جانە قارجىلىق وپەراتسيالاردى تەكسەرۋسىز ورىنداماۋعا شاقىردى.