قازاقستاننىڭ اتىن الەمگە پاش ەتىپ، ەكونوميكاسىن مىعىم ۇستاپ تۇرعان ءۇش ۋران كاسىپورنىنىڭ ءىرى ۇلەستەرى رەسەيگە ءوتتى. انىعىراق ايتقاندا، رەسەيلىك "ۋراني ۋان گرۋپ" مەملەكەتتىك كومپانياسىنا ۋران كاسىپورىنىنىڭ ءىرى ۇلەستەرىن بەرۋگە رۇقسات بەرىلدى، دەپ حابارلايدى "ادىرنا" ۇلتتىق كومپانياسى "قازتاگ"-قا سىلتەمە كورسەتە وتىرىپ.
ۇكىمەتىنىڭ قاۋلىسىنا سايكەس، Uranium One Netherlands B. V "قاراتاۋ" جشس-نە قاتىسۋ ۇلەسىنىڭ 50%-ى بەرىلگەنى بەلگىلى بولدى. Uranium One Utrecht B. V - "حوراسان-U "بىرلەسكەن كاسىپورنى" جشس-نا قاتىسۋ ۇلەسىنىڭ 30%-ىن ۇستاتتى، Uranium en Rotterdam B. V. - "وڭتۇستىك تاۋ-كەن حيميالىق كومپانياسى" بىرلەسكەن كاسىپورنىنا قاتىسۋ ۇلەسىنىڭ 70%-ىن بەردى.
ءىرى ۇلەستىڭ بارلىعى ماسكەۋ قالاسىندا تىركەلگەن "ۋراني ۋان گرۋپ" اق پايداسى ءۇشىن يەلىكتەن شىعارىلىپ وتىر. بۇل كومپانيا رەسەيدىڭ "روساتوم" مەملەكەتتىك كورپوراتسياسىنىڭ قۇرامىنا كىرەدى.
ەكونوميست عالىمجان ايتقازيننىڭ ايتۋىنشا، ۋران كاسىپورىندارىنىڭ باسشىلىعى شەتەلدىكتەردەن رەسەيدىڭ قولىنا وتكەن.
- مۇنىڭ استارىندا رەسەيگە قارسى سالىنعان سانكتسيالاردىڭ قاۋپىنەن سەسكەنۋ بار. سونىڭ سالدارىنان رەسەي كومپانيالارى شەتەلدىك يۋريسديكتسيالاردان كەتۋگە ءماجبۇر", - دەدى ول.
ال رەسەي فەدەراتسياسىنىڭ سىرتقى ىستەر مينيسترلىگى اتوم ەلەكتر ستانتسياسىن سالۋ بويىنشا قازاق تاراپىمەن ىنتىماقتاستىققا دايىن ەكەندەرىن مالىمدەدى. ولار قازىرگى ۋاقىتتا جوبانىڭ پارامەترلەرى، ونىڭ قارجىلىق مودەلى بويىنشا كەلىسسوز جۇرگىزىلگەنىن حابارلادى.
"ادىرنا" ۇلتتىق پورتالى
