رەسەي 1 مامىردان باستاپ دوستىق مۇناي قۇبىرى ارقىلى قازاقستان مۇنايىن گەرمانياعا جەتكىزۋدى توقتاتۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى Reuters-كە سىلتەپ.
اگەنتتىك مالىمەتىنشە، رەسەيلىك تاراپ ترانزيت كەستەسىن وزگەرتىپ، ونى قازاقستان مەن گەرمانيانىڭ پروفيلدىك ۆەدومستۆولارىنا جولداعان. الايدا رەسەي فەدەراتسياسىنىڭ ەنەرگەتيكا مينيسترلىگى بۇل اقپاراتقا قاتىستى رەسمي تۇسىنىكتەمە بەرمەگەن.
ال كرەملدىڭ ءباسپاسوز حاتشىسى دميتري پەسكوۆ مۇنداي جوسپاردان بەيحابار ەكەنىن ايتىپ، اقپاراتتى تەكسەرۋگە ۋادە بەرگەن.
بۇعان دەيىن «دوستىق» قۇبىرى ارقىلى گەرمانياعا، اسىرەسە شۆەدت قالاسىنداعى ءىرى مۇناي وڭدەۋ زاۋىتىنا شيكىزات تۇراقتى جەتكىزىلىپ كەلگەن. ۋكرايناداعى سوعىستان كەيىن رەسەي مەن گەرمانيا اراسىنداعى قارىم-قاتىناس ناشارلاپ، اتالعان زاۋىتتى باسقارۋ نەمىس بيلىگىنىڭ قولىنا وتكەن.
سوعان قاراماستان، قۇبىر ارقىلى قازاقستان مۇنايى ەۋروپاعا جەتكىزىلىپ وتىر. 2025 جىلى قازاقستان گەرمانياعا وسى باعىت ارقىلى 2,1 ملن توننادان استام مۇناي ەكسپورتتاعان. بۇل تاۋلىگىنە شامامەن 43 مىڭ باررەلدى قۇرايدى جانە 2024 جىلمەن سالىستىرعاندا 44%-عا جوعارى.
قازترانسويل مالىمەتىنشە، 2026 جىلدىڭ العاشقى توقسانىندا گەرمانياعا جەتكىزىلگەن قازاقستاندىق مۇناي كولەمى 730 مىڭ تونناعا جەتىپ، وتكەن جىلمەن سالىستىرعاندا 353 مىڭ تونناعا ارتقان.
ساراپشىلاردىڭ پىكىرىنشە، ءترانزيتتىڭ ىقتيمال توقتاۋى قازاقستان مۇنايىن ەۋروپاعا جەتكىزۋدەگى نەگىزگى باعىتتاردىڭ بىرىنە اسەر ەتۋى مۇمكىن.
