ۇلىتاۋ وبلىسىنداعى «قازاقمىس» كورپوراتسياسىنا قاراستى «جومارت» كەن ورنىندا بولعان قايعىلى وقيعادان كەيىن ءماجىلىس دەپۋتاتتارى ەڭبەك قاۋىپسىزدىگىن كۇشەيتۋ ماسەلەسىن كوتەردى، دەپ حابارلايدى "ادىرنا" ۇلتتىق پورتالى.
ءماجىلىس وتىرىسىندا دەپۋتات ارمان قالىقوۆ ەلىمىزدەگى ونەركاسىپتىك قاۋىپسىزدىك جۇيەسىن تۇبەگەيلى قايتا قاراۋ قاجەتتىگىن مالىمدەدى. ونىڭ ايتۋىنشا، «قازاقمىس» كاسىپورىندارىنداعى جازاتايىم وقيعالاردىڭ جيىلەۋى سالاداعى باقىلاۋ مەن قاۋىپسىزدىك ستاندارتتارىنىڭ السىرەگەنىن كورسەتەدى.
«قاۋىپتى وندىرىستەردە قاۋىپسىزدىك ماسەلەلەرىن قامتاماسىز ەتەتىن مەملەكەتتىك ينستيتۋتتار جويىلدى. سونىڭ سالدارىنان ءبىز جوعارى بىلىكتى ماماندار مەن ينسپەكتورلاردى جوعالتىپ، عىلىمي-ادىستەمەلىك بازادان ايىرىلدىق. بۇل جاعداي تەحنوگەندىك قاۋىپسىزدىككە كەرى اسەرىن تيگىزدى»، – دەدى دەپۋتات.
ول مۇنداي وقيعالاردىڭ قازاقستانداعى كەن ورىندارى مەن شاحتالارىندا جىل سايىن قايتالاناتىنىن العا تارتىپ، ونەركاسىپتىك قاۋىپسىزدىكتى قامتاماسىز ەتەتىن مەملەكەتتىك ينستيتۋتتاردىڭ ماڭىزدىلىعىن اتاپ ءوتتى.
"نەگە جوعارى پايدا اكەلەتىن كاسىپورىن جىلدار بويى ەڭبەك قاۋىپسىزدىگىن قامتاماسىز ەتپەي كەلەدى؟! مۇنداي تەحنوگەندىك اپاتتار جىل سايىن ەلىمىزدىڭ كەن ورىندارىندا، شاحتالارىندا، مۇناي كەن ورىندارىندا قايتالانادى. بۇل ونەركاسىپتىك قاۋىپسىزدىك مەملەكەتتىك ينستيتۋتتارىنىڭ ماڭىزدىلىعى مەن قاجەتتىلىگىن ايقىندايدى", — دەدى ول.
دەپۋتاتتار "قازاقمىس"-تىڭ جۇمىسىنا قاتىستى بىرنەشە ۇسىنىس ايتتى.
- ونەركاسىپتىك قاۋىپسىزدىك ماسەلەلەرىمەن اينالىساتىن، تىكەلەي پرەمەر-مينيسترگە باعىناتىن جەكە مەملەكەتتىك ورگان قۇرۋ;
- قاۋىپتى وندىرىستەردە جۇمىس ىستەيتىن قىزمەتكەرلەردىڭ ءومىرى مەن دەنساۋلىعىن ساقتاندىرۋ جۇيەسىن جەتىلدىرۋ;
- كەنىشتەردىڭ جەلدەتۋ جۇيەلەرىن نورماتيۆتەرگە سايكەستىگىن تەكسەرۋ;
- تاۋ-كەن كاسىپورىندارىنداعى جابدىقتار مەن تەحنولوگيالاردى جاڭعىرتۋعا قارجى ءبولۋدى قامتاماسىز ەتۋ.
ەسكە سالا كەتەيىك، 17 اقپاندا ۇلىتاۋ وبلىسىنىڭ جاڭاارقا اۋدانىندا ورنالاسقان «جومارت» كەن ورنىندا تاۋ جىنىسى وپىرىلىپ ءتۇسىپ، جەتى كەنشى قازا تاپقان.
