كاسپي تەڭىزىنىڭ ازەربايجانعا قاراستى بولىگىندە مۇناي توگىلدى، دەپ حابارلايدى "ادىرنا" ۇلتتىق پورتالى.
جەرگىلىكتى باق مالىمەتىنشە، ديۋبەندى كەنتىنىڭ جاعاجايى ماڭىندا مۇناي توگىلۋ فاكتىسى تىركەلگەن. الدىن الا مالىمەت بويىنشا، وقيعا «ازمۇناي» وندىرىستىك بىرلەستىگىنە تيەسىلى سۋاستى مۇناي قۇبىرىنىڭ زاقىمدانۋىنان بولعان.
ازەربايجاننىڭ مەملەكەتتىك مۇناي كومپانياسى تاراتقان اقپاراتقا سايكەس، 19 ماۋسىم كۇنى جاۋاپتى قىزمەتتەرگە اتالعان اۋماقتا مۇناي ىزدەرىنىڭ بايقالعانى تۋرالى حابارلاما تۇسكەن. جۇرگىزىلگەن تەكسەرۋ ناتيجەسىندە لاستانۋ كوزى سۋاستى مۇناي قۇبىرى ەكەنى انىقتالعان.
كومپانيانىڭ مالىمەتىنشە، وقيعادان كەيىن اتالعان قۇبىر ارقىلى مۇناي تاسىمالداۋ دەرەۋ توقتاتىلىپ، تەڭىزگە مۇنايدىڭ ودان ءارى اعۋىنا جول بەرىلمەگەن.
سۇڭگۋىرلەر جۇرگىزگەن زەرتتەۋ بارىسىندا قۇبىردان مەحانيكالىق زاقىم انىقتالعان. الدىن الا بولجام بويىنشا، زاقىم سىرتقى زاتتىڭ اسەرىنەن، ىقتيمال كەمە زاكىرىنىڭ ءتيىپ كەتۋىنەن پايدا بولعان. قازىر زاقىمدانعان ۋچاسكەدە جوندەۋ-قالپىنا كەلتىرۋ جۇمىستارى جۇرگىزىلىپ جاتىر.
وقيعانىڭ ناقتى ءمان-جايى مەن كەلتىرىلگەن ەكولوگيالىق زالال كولەمى انىقتالۋدا.
